Сурхондарё вилоятининг Бандихон тумани ҳокими Абдумалик Алламуродов бугунги кунда аҳоли орасида имкон қадар давлатдан фойдаланиб, ишламасдан пул олишга уринаётганлар борлигини айтди. “Шу ишни ўзига касб қилиб олганлар ҳам бор”, дейди ҳоким “Дарё” журналисти билан суҳбатида.
Оғир бўлса-да, айтиш керакки, шу ишни ўзига касб қилиб олганлар ҳам бор. Муҳтарам юртбошимизнинг “Одамларга балиқ эмас, қармоқ бериб, ўз ризқини топишга ўргатайлик”, деган гаплари бор. Биз имкон қадар улар билан ишлаб, тўғри йўналиш берсак, бунақа тоифадаги инсонлар ҳам камаяди, — дейди ҳоким.
Бандихон тумани ҳокимининг қўшимча қилишича, ҳокимнинг сайёр қабулида ҳам имкон қадар ишламай, давлатдан моддий манфаат кўришга уринаётганлар учрайди. Ҳокимнинг тан олишича, аҳолини моддий таъминлаш борасида туман республика миқёсида энг юқори ўринларда туради.
Туманимизда 18500 га яқин оила бўладиган бўлса, 2023 йилнинг ўн ойлик кўрсаткичларига қараганимизда 8100 дан ортиқ оила ҳар ой давлатдан бир ёшгача, икки ёшгача ва 18 ёшгача болалар пули ва моддий ёрдам олиши маълум бўлди. Бундай ёрдамга муҳтож оилалар жами оилаларнинг 40 фоиздан кўпроғини ташкил қилар экан, — дейди Бандихон тумани ҳокими Абдумалик Алламуродов.
Ҳокимнинг аниқлаштиришича, айнан шу оилаларга моддий ёрдам бериш учун ойига республика бюджетидан 4 миллиард сўмдан ортиқ маблағ сарфланади.
Аввалроқ Қашқадарё вилояти ҳокими Муроджон Азимов мурожаатчи фуқаролардан бирининг хонадонига бориб, меҳнатга лаёқатли, забардаст йигитнинг ишламай, “давлатнинг қўлига қараб ётганига” гувоҳ бўлганини, унинг уйига ҳақиқий муҳтож деган маънода бозор-ўчар қилиб борганидан уялиб кетганини маълум қилганди.
Изоҳ (0)