900 га яқин одам Россиядан Ғазо секторидан уларни эвакуация қилишни сўради, деди Владимир Путин. Шунингдек, Россия президенти анклавдаги вазиятни оғир деб баҳолади ва у ерда қолган русларга ёрдам бериш давлатнинг муқаддас бурчи эканини айтди.
“У ердаги вазият анчадан буён ёмон. Менимча, 900 киши уларни олиб кетиш илтимоси билан бизга мурожаат қилган. Улардан 639 нафари Россия фуқаролари, яна 271 нафари уларнинг қариндошларидир”, — деди Путин ҳукумат аъзолари билан учрашувда.
“Жуда муҳим гуманитар олижаноб миссия. Биз ҳозирги воқеалардан азоб чекаётган одамларга ёрдам беришимиз керак. Биз у ерда нима бўлаётганини кўряпмиз. Шундай экан, одамларга, айниқса, фуқароларимизга ёрдам бериш муқаддас бурчимиздир”, — дея қўшимча қилди давлат раҳбари.
Президент Фавқулодда вазиятлар вазирлиги раҳбари Александр Куренковдан йиғилишда эвакуация ва инсонпарварлик ёрдами етказиб бериш билан боғлиқ вазият ҳақида маълумот беришни сўради. Вазирнинг айтишича, Ғазо секторига Россиядан 245 тоннадан ортиқ инсонпарварлик ёрдами жўнатилган, 23 ноябрь куни эса яна бир рейс жўнатиш режалаштирилган.
Россияликларни эвакуация қилиш Исроил ва Фаластиннинг ҲАМАС ҳаракати ўртасида 7 октябрдан бери давом этаётган уруш фонида ташкил этилган. Чет элликлар биринчи марта 1 ноябрдан озод этила бошланди. Русларнинг биринчи гуруҳи 12 ноябрда Ғазодан олиб чиқилди. Фавқулодда вазиятлар вазирлигининг сўнгги маълумотларига кўра, Россияга 553 киши олиб келинган.
Изоҳ (0)