Саудия Арабистони валиаҳд шаҳзодаси Муҳаммад бин Салмон БРИКСнинг навбатдан ташқари саммитида барча давлатларни Исроилга қурол экспортини тўхтатишга чақирди. Бу ҳақда Al-Arabiya хабар берди.
Саудия Арабистони 1967 йилги чегараларда Фаластин давлатини яратиш учун жиддий ва кенг қамровли тинчлик жараёни бошланишини талаб қилади.
“Қиролликнинг позицияси доимий ва мустаҳкамдир: Фаластинда хавфсизлик ва барқарорликка эришишда икки давлат қарори билан боғлиқ халқаро қарорларни амалга оширишдан бошқа йўл йўқ”, — деди Муҳаммад бин Салмон.
У Саудия Исроилнинг Ғазодаги ҳарбий амалиётларини қоралашини яна бир бор таъкидлаб, уларни зудлик билан тўхтатишни талаб қилди. Муҳаммад бин Салмон Ғазода содир бўлаётган “шафқатсиз жиноятлар” уларга барҳам бериш учун биргаликда ҳаракат қилишни талаб қилишини айтди.
Саудия Арабистони фаластинликларни Ғазо секторидан мажбурий кўчирилишига қарши чиқиб, сектордаги гуманитар шароитнинг ёмонлашувини тўхтатиш учун жамоавий саъй-ҳаракатларга чақирди.
“Саудия Арабистони 7 октябрь куни уруш бошланганидан бери Ғазо секторидаги тинч аҳолини ҳимоя қилиш учун тинимсиз саъй-ҳаракатлар қилди”, — дея қўшимча қилди Муҳаммад бин Салмон.
Изоҳ (0)