Моссад — Исроил разведка хизмати раҳбари Давид Барнеа гаровга олинганларни озод қилиш бўйича келишувнинг якуний версиясини муҳокама қилиш учун яқин орада Қатарга ташриф буюриши мумкин. Бу ҳақда Исроилнинг Yediot Аhronot газетаси хабар берди.
Исроил ва ҲАМАС ўртасидаги келишув шу ҳафта охиригача тузилиши мумкин. Агар бу яҳудий давлати Вазирлар Маҳкамаси аъзолари томонидан маъқулланса, келишув бир ёки икки кун ичида эълон қилиниши мумкин.
“Исроил ва ҲАМАС ўртасидаги музокаралар жуда қийин кечмоқда, чунки томонлар кўп жиҳатларда ён босишни истамайди. Хусусан, яҳудий давлати, ҲАМАС хоҳлаганидек, беш кунлик сулҳ эълон қилишдан бош тортган. Уларга жавобан Фаластин гуруҳи гаровга олинганлар сонини озод қилишга тайёр бўлган 80 кишидан 50 кишига қисқартирди”, — дейилади хабарда.
Бундан ташқари, Исроил болаларни фақат оналари билан бирга қўйиб юборишни, Ғазодан гаровга олинган кексаларни ҳам озод қилишни талаб қилмоқда, бироқ ўз қамоқхоналаридаги кекса фаластинлик маҳбусларни озод қилишга рози эмас. Бунга жавобан ҲАМАС исроиллик кексаларни озод қилишдан бош тортди.
9 ноябрда Барнеа Қатарда Марказий разведка бошқармаси директори Уилям Бернс ва мамлакат расмийлари билан биргаликда ҲАМАС томонидан Ғазода гаровга олинган 10-20 нафар одамни озод қилиш шартларини муҳокама қилгани ҳақида хабар берилди.
15 ноябрь куни Reuters агентлиги ҲАМАС Исроил билан келишувнинг умумий шартларига рози бўлгани, у Ғазо секторида уч кунлик оташкесим эвазига 50 га яқин гаровга олинганларни озод қилишни назарда тутиши таъкидланди.
Исроил ҳам яҳудий давлатидаги қамоқхоналарда сақланаётган баъзи фаластинлик аёллар ва болаларни озод қилиш, секторга келаётган гуманитар ёрдам ҳажмини ошириши керак бўлади. Бироқ Исроил расмийлари ҳали келишув шартларига рози бўлмаган ва тафсилотларни муҳокама қилишда давом этмоқда.
Изоҳ (0)