Европа Иттифоқи афғон аҳолиси ва қочқинлари учун гуманитар ёрдам сифатида 61 млн евро ажратди

Европа Иттифоқи Афғонистондаги гуманитар вазият ёмонлашгани сабабли мамлакатдаги энг муҳтож қатламлар ва Покистондаги қочқинлар учун 61 миллион евро миқдорида инсонпарварлик ёрдами ажратди, дея маълум қилди Европа Комиссияси.

“Афғонистонда фаолият юритувчи гуманитар ташкилотлар учун жами 60 миллион евро ва Покистондаги ташкилотлар учун яна 1 миллион евро ажратилди. Ушбу маблағ Афғонистондаги озиқ-овқат инқирозига қарши туришга ёрдам беради, бу ерда аҳолининг деярли ярми озиқ-овқат танқислигига дучор бўлмоқда”, дейилади Еврокомиссия баёнотида.

Қайд этилишича, Европа Иттифоқининг Афғонистонга навбатдаги ёрдам пакети уй-жой, ҳимоя, соғлиқни сақлаш, озиқ-овқат, сув ва санитария каби бошқа эҳтиёжларни ҳам қамраб олади, айниқса октябрь ойида мамлакат ғарбида содир бўлган қатор зилзилалардан жабрланган аҳоли учун сарфланади.

Молиялашнинг бир қисми, Европа Комиссиясининг тушунтиришича, Афғонистонга қайтган афғон қочқинларини қўллаб-қувватлашга йўналтирилади.

 

ЕИ маълумотларига кўра, бу янги пакет Европа Иттифоқи томонидан жорий йилда Афғонистонга ажратилган деярли 94 миллион евро гуманитар ёрдам, жумладан, яқинда рўй берган зилзилалардан кейин берилган 4,5 миллион евродан иборат ёрдамга қўшимча бўлади.

Қўшимча қилинишича, “Европа Иттифоқининг Афғонистонга гуманитар ёрдами фақат жойлардаги ҳамкорлар орқали амалга оширилади”.