“Артист” телелойиҳасидаги иштироки билан томошабинлар эътиборига тушган ёш хонанда Элёр Мелибоев илк яккахон концерт дастурини ўтказди. Яккахон ижодини бошлаганига кўп вақт бўлмаган ижодкорнинг “Халқлар дўстлиги” санъат саройида концерт бериши кўпчилик учун кутилмаган янгилик бўлганди. “Концерт беришга ҳали эрта”, “Унинг бирорта муаллифлик қўшиқлари йўқ” каби эътирозлар ҳам қулоғимизга чалинганди. Хонанданинг таклифига кўра, “Дарё” мухбирлари концертга бориб, устоз санъаткорлар ва мухлисларнинг Элёр Мелибоев ижоди ҳақидаги фикрларини ўрганди.
— Элёрбекнинг концертига ҳайдовчи сифатида келганман. 13 ёшли ўғлим унинг ашаддий мухлиси, концерт ҳақидаги хабарлар тарқалганда чипта олиб беринг, деб илтимос қилганди. 22 ёшда катта саройда концерт бериш осон эмас. Қойил қолганим: мухлислари кўп экан, зал томошабинлар билан тўлди. Умид қиламанки, концерт ҳам аъло даражада ўтади, — дейди сўз устаси Зокир Очилдиев.
Айтиш жоизки, кўп хонандалар жонли ижрода концерт беришдан қўрқади. Элёр Мелибоев эса жонли ижрода куйлашдан қўрққани йўқ.
Концертда хонанданинг ковер қўшиқларидан ташқари, муаллифлик тароналари ҳам жаранг сочди. “Тўхта уруш” қўшиғини ҳеч бир томошабин кўз ёшларсиз тинглагани йўқ.
Хонанда болаликда катта саройда концерт берса олд ўриндиқда бувиси ўтиришини орзу қилгани ва жудолик сабаб у инсондан эрта айрилганини эслаб кўзига ёш олди.
— Бувимнинг ўрни бўлакча эди, шу боис у инсоннинг ўрнига ҳеч кимни ўтказмасликларини сўрадим, — деб кўзига ёш олди хонанда.
— Биринчи қадамда кам-кўстлар бўлиши табиий ҳол. Энг муҳими, ўша камчиликлардан вақтида тўғри хулоса чиқариш керак. Мен учун қадрли бўлган ижодкор Отабек Муҳаммадзоҳидга концертимиз борасида “Камчиликларимиз бор”, деганимда “Тугамасин, чунки камчиликсиз ижодкор энг юқори чўққига кўтарилган бўлади. Энг юқорига чиққандан кейин эса пастга қараб тушади”, деганди. Элёрбекнинг нафақат ижодини, балки инсонийлигини ҳам ҳурмат қиламан. Қўли кўксида, самимий бола, — дейди “Дизайн” жамоаси аъзоси Саъдулла Фатҳуллаев.
— Элёрни санъатга қадам қўймасидан олдин ҳам танирдим. Чунки у билан Фарғонанинг бир шаҳрида яшаганмиз. Истеъдодли, меҳнаткаш ва самимий инсон. Имкон бўлганда, отни қамчилаш керак. Талаб бўлаётгани учун ҳам 22 ёшида концерт беряпти. Қанча концерт берса, мен қўлдан келганча ёрдам беришга тайёрман, — дейди қизиқчи Элмурод Ҳақназаров.
Концертга шоу-бизнес оламининг кўплаб вакиллари, устоз санъаткорлар ташриф буюришди. Томошабинлар орасида Соат Шарипов, Абдулла Қурбонов, Меҳриддин Раҳматов, Аъло Раҳимова, Лола Аҳмедова каби устоз санъаткорларнинг борлиги қувонарли ҳол.
Хонанда концертдан бир неча ой аввал Instagram тармоғида челленж ўтказгани ва учта ғолибни саралаб, уларни концерт дастурига таклиф этганди. Челленжнинг финал босқичи катта саҳнада бўлиб ўтди ва ғолибни мухлислар танлаб беришди. Унга кўра фарғоналик Розияхон исмли қиз ғолиб бўлиб, дугоналари билан бирга Дубайга саёҳат йўлланмасини ютиб олди.
Кўтаринки кайфиятда ўтган концерт дастуридан сўнг хонанданинг ҳам фикрлари билан қизиқдик.
— Аввалига жуда ҳаяжонландим, чунки бу саройда томошабин сифатида ҳам концерт кўрмаганман. Шу боис аввалига бир оз ҳаяжонландим, аммо мухлислар олқиши куч бағишлади. Қўшиқ сўзларини унутиб қўяман деб хавотир олгандим. Аммо ҳаммаси аъло даражада ўтди, — дейди хонанда.
Репортажни қуйидаги ҳавола орқали тўлиқ томоша қилишингиз мумкин.
Изоҳ (0)