Саудия Арабистони расмийлари Исроил билан муносабатларни нормаллаштириш бўйича келишувни тайёрлаш бўйича музокараларни кейинга қолдирди. Бу ҳақда манбаларга таяниб, Reuters ва Bloomberg хабар берди.
Нашрлардаги маълумотларга кўра, Саудия Арабистони ўз позициясини Саудия—Исроил муносабатларини нормаллаштириш бўйича музокараларни қўллаб-қувватловчи АҚШ расмийларига етказган. Bloomberg манбаларининг қайд этишича, расмий Ар-Риёд бу қадамни дипломатик музокараларнинг якуни сифатида эмас, балки пауза сифатида баҳолаган.
Исми ошкор этилмаган америкалик амалдор Bloomberg’га Оқ уй Саудия Арабистони расмийлари билан алоқада эканини ва ташаббус тўхтатилгани ҳақида маълумот олмаганини айтди. Шу билан бирга, AFP манбаси Ар-Риёд бу ҳақда Вашингтонни хабардор қилганини айтди.
Саудия Арабистони ҳукумати журналистларнинг сўровларига жавоб бермади.
7 октябрь куни ҲАМАС Исроилга ҳужум қилишидан олдин Исроил ва Саудия Арабистони раҳбарлари келишув сари ҳаракатланишга ишонч билдиришган эди.
Муносабатларни нормаллаштириш келишуви Саудия Арабистони Исроилни тан олишини ҳамда у билан дипломатик ва савдо алоқаларини бошлашини назарда тутади. Бунга жавобан Саудия Исроилдан фаластинликларга ён беришни, АҚШдан эса хавфсизлик кафолатлари ва ядро дастурида ёрдам олишни истайди, деб ёзган Тhе Wаll Street Journal август ойида. Нашр манбаларининг айтишича, Ар-Риёд ва Вашингтон келишувнинг умумий контурлари бўйича келишиб олган.
Ғарб матбуоти Саудия Арабистони ва Исроил ўртасидаги муносабатларни нормаллаштириш бўйича келишув Яқин Шарқда сўнгги ўн йилликлардаги энг муҳим тинчлик келишуви бўлишини таъкидламоқда.
Араб дунёсининг аксарият давлатлари ҳамон Исроилни тан олишдан бош тортади. 1979 йилда Миср Исроилни тан олган биринчи араб давлатига айланганди. Иордания 1994 йилда, Баҳрайн ва Бирлашган Араб Амирликлари эса 2020 йилда шундай қилган.
Изоҳ (0)