Россия президенти Владимир Путин Исроил ва Фаластин ўртасида давом этаётган урушга муносабат билдирди.
У Исроилнинг “жойлашув сиёсати”ни зўравонликнинг янгидан авж олишининг сабабларидан бири деб атади ва Фаластин муаммоси ҳар бир мусулмоннинг қалбида эканини ҳамда улар томонидан адолатсизлик сифатида қабул қилинишини таъкидлади.
Путин Исроил ташкил этилганда суверен Фаластин давлатини яратиш ҳақида ҳам гапирилганини, аммо бу ҳеч қачон амалга оширилмаганини эслатди. Унинг сўзларига кўра, АҚШ сиёсий муаммоларни ҳал қилиш ўрнига Фаластинга “садақа” бериш билан шуғулланиб келган.
“АҚШ араб-исроил можаро зонасидаги механизмларни эътиборсиз қолдирди. Кейин эса ҳамма нарсани бир ўзи тузатишга қарор қилди. Сўнгги йилларда улар фаластинликларнинг моддий эҳтиёжларини қондиришга эътибор қаратди. Аслини олганда, улар халқнинг ҳақиқий муаммоларини ҳал қилиш ўрнига уларга “садақа” ташлаб туришга ҳаракат қилди. Биз ҳар доим айтганмиз, фундаментал масалаларни ҳал қилмасдан туриб, ҳеч нарсани ўзгартириб бўлмайди”, — деди Россия президенти.
Президент Исроил ва ҲАМАСни “аёлларни тинч қўйишга” ва эркакларга ўзаро жанг қилишга имкон беришга чақирди. “Россия Исроил ва Фаластин ўртасидаги ғазаб жуда катта эканини тушунади, аммо тинч аҳоли ўртасидаги йўқотишларни минималлаштириб, болалар ва аёлларни ўз ҳолига қўйиш керак”, — деди Путин.
Унинг сўзларига кўра, можаронинг кенгайиши жиддий оқибатларга олиб келиши мумкин, жумладан, энергетика соҳасида ҳам.
Изоҳ (0)