ОЧЛ. “Навбаҳор” ўз майдонида “Мумбай Сити” устидан йирик ҳисобда ғалаба қозонди (видео)

Футбол бўйича Осиё Чемпионлар Лигаси гуруҳ босқичининг 2-турида “Навбаҳор” 3-октябрь, сешанба куни “Мумбай Сити”га қарши баҳс олиб борди.

Учрашувнинг биринчи бўлимида дарвозалар ишғол этилмади. Қайд этиб ўтиш жоиз, Ҳиндистон клуби вакили Грег Стюарт 43-дақиқада пенальтидан тепган тўпини дарвозабон Ўткир Юсупов қайтарди. 

Иккинчи бўлимда эса наманганликлар ҳисобни очди. 52-дақиқада Жамшид Искандеров узоқдан ажойиб зарба билан дарвозани ишғол этди. Орадан 6 дақиқа ўтиб, Остон Ўруновнинг қанотдан уюштириб, узатган тўпини Жасур Яхшибоев дарвозага жойлаб қўйди. Ўйин сўнгида эса Дониёр Абдуманнопов учрашувга якун ясовчи гол муаллифига айланди. 

Ушбу ғалабадан сўнг Самвел Бабаян шогирдлари очколари сонини 4 тага етказиб олди.

Эслатиб ўтамиз, Наманган жамоаси 1-турда Саудиянинг “Ал-Ҳилол” клуби билан 1:1 ҳисобида дуранг ўйнаганди. 

ОЧЛ

2-тур баҳси

3-октябрь, сешанба

“Навбаҳор” – “Мумбай Сити” 3:0

Голлар: 1:0 — 52 Жамшид Искандеров, 2:0 — 58 Жасур Яхшибоев, 3:0 — 88 Дониёр Абдуманнопов.

“Навбаҳор”: 1. Ўткир Юсупов, 5. Милош Милович, 6. Иброҳим Йўлдошев, 7. Остон Ўрунов (19. Дониёр Абдуманнопов, 82), 8. Жасурбек Яхшибоев (77. Асадбек Собиржонов, 82), 10. Жамшид Искандеров, 13. Филип Иванович, 14. Жамшид Болтабоев, 22. Игор Голбан, 23. Йован Жокич, 91. Тома Табатадзе (21.Темурхўжа Абдухолиқов,72).

“Мумбай Сити”: 1. Пурба Лаченпа, 4. Тири, 5. Меҳтаб Сингҳ, 6. Викрам Партап (29. Бипин Сингҳ, 70), 7. Лаллиагзуала Чҳангте (23. Абдуносир Эл Хаяти, 58), 8. Ван Ниэфф, 18. Ростин Гриффиц, 24. Грег Стюарт, 30. Жорже Перейра Диас, 31. Акаш Мишра, 45. Лаленгмавиа.

Огоҳлантиришлар: Иброҳим Йўлдошев (62), Жорже Перейра Диас (66).