Ўзбекистонда 65 нафар боланинг ўлимига сабабчи дея қаралаётган “Док-1 Макс” сиропи масаласида суд иши бошлангани, кўплаб судланувчилар судда тергов қилинаётгани ҳақида хабар берилганди. Суднинг 22-сентябр куни давом этган мажлисида 33 минг доллар олди-бердисида воситачилик қилгани айтилган айбланувчига қамоққа олиш тарзидаги эҳтиёт чораси қўлланганди. Суд залидан қамоққа олинган айбланувчи бугун, 27-сентябр куни давом этган суд мажлисида кўрсатмасини марҳум 65 нафар болаларнинг яқинларига таъзия изҳор этиш билан бошлади. “Дарё” мухбирига кўра, илгари судда бу ҳолат учрамаган.

Судда сўз олган Ж.Э. олти йиллик иш фаолияти давомида ҳалол ишлаганига урғу бериб, судда унга қўйилаётган айбловлардан бири Жиноят кодексининг 212-моддаси (пора олиш-беришда воситачилик қилиш)га тўлиқ иқрорлигини билдирди. Ва бундан чин кўнгилдан пушаймон эканини айтиб, бу ҳақда тергов органига чақирилган пайтда ўзи бор гапни айтиб берганини қўшимча қилди.

Мен Жиноят кодексининг 212-моддасида кўрсатилган айбловни тан оламан ва бундан пушаймонлигимни билдираман, — деди судда сўз олган айбланувчи Ж.Э.

Судланувчи дастлабки суд мажлисларида тилга олинган 33 минг доллар пора воқеасига қўшимча киритиб, бу пулнинг олди-бердисида воситачи бўлганини таъкидлади. 

Ҳолат 2022 йилнинг июнь ойлари бошида содир бўлган. Ўша кунларда менга институтда бирга ўқиган курсдошим телефон қилиб, раҳбари Р.С.П. мен билан учрашмоқчи эканини, рози бўлсам, телефон номеримни бермоқчилигини айтди. Хўп дедим, кўп ўтмай унинг раҳбари телефон қилди. Кўчадаги кафеларнинг бирида кўришишни таклиф қилди. У билан кўришдик. Фаолияти ҳақида гапириб, “Кураракс” дори воситасини рўйхатдан ўтказиш бўйича мурожаат қилганини, аммо бу дори инспекцион текширувга тушганини айтди. Ва инспекцион текширувдан ўтказмасдан, дорини рўйхатдан ўтказишнинг қонуний имкони бор-йўқлигини сўради. Мен бу иш ваколатимда йўқлигини айтдим. У эса шу ишга ваколати етадиган раҳбарингдан сўра, деди.

Шундан сўнг бу ҳақда раҳбарим Ш.Ш.га айтдим ва ҳиндистонлик ишлаб чиқарувчи айтганидек, қонуний имкони бор-йўқлигини сўрадим. Раҳбарим жавоб бермади. Лекин орадан бир-икки кун ўтиб, раҳбарим билан кўришганимда у менга сўраган масалани ҳал қилиш имкони борлигини, бунинг учун ҳиндистонлик 45 минг доллар бериши кераклигини айтди. Шундан сўнг мен бу ҳақда Р.С.Р.га айтдим. У бу ҳақда раҳбарларимга айтиб, ўйлаб кўраман, деди. Кейинчалик бу пуллар кўп, камайтириш имкони борми, деб сўради. Раҳбарим 40 минг бўлади, деди. Ҳиндистонлик эса 33 минг доллар бера оламиз, деди. Раҳбарим хўп деди, — дейди судланувчи.

Судланувчининг қўшимча қилишича, у ҳиндистонлик ишлаб чиқарувчи билан 2022 йилнинг 30 июнь куни кечки пайт кўришиб, оқ қоғозда ўралган ва пакетга солинган пулни олиб қолиб, бир соатдан сўнг раҳбарига бериб юборган. 

Мен бу пулдан ҳеч қандай манфаат кўрмаганман. Шу сабаб оқ қоғозга ўралган пулни очиб ҳам кўрмадим. Фақат бир соат қўлимда ушлаб турдим ва раҳбарим келгач, бериб юбордим, — деди.

Судда сўроқ қилинган Qurамах Medical МЧЖ директори ҳиндистонлик С.Р.П. адвокатларнинг саволига жавоб берар экан, Marion Biotech PVТ. Ltd корхонасида инспекцион текширув ўтказилишини тўхтатиш учун Ж.Э. исмли масъулга 33 минг доллар берганини тан олганди. Кейинчалик у бу кўрсатмасини ўзгартирган.

Суднинг 15 сентябрдаги мажлисида сўроқ қилинган “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК рўйхатдан ўтказиш бўлими бошлиғи Ш.Ш. унга берилгани айтилган 33 минг доллар пулни олганини рад этганди. 

Р.С.П. жиноий шериклари Ж.С. ва Б.Қ.лар билан тузилган жиноий режасини амалга ошириш мақсадида Ж.Э. билан аввалига телефон орқали боғланиб, кейинроқ у билан ЖИБ Миробод туман суди яқинида жойлашган “Б&Б” кафесида кўришган. Суҳбат давомида Р.С.П. корхонага тайинланган инспекцион текширувни бекор қилишда амалий ёрдам сўраб, бунинг учун моддий манфаат ваъда қилган. Шунда Ж.Э. унинг таклифини раҳбарларига етказиб, тез кунларда уларнинг жавобини маълум қилишини билдирган. Ж.Э. таклифни давлат маркази рўйхатдан ўтказиш бўлими бошлиғи Ш.Ш.га етказган. Масъул ушбу хизмат 45 минг доллар бўлишини айтган. Ҳиндистонлик тадбиркор уларга 33 минг доллар бера олишини билдирган. Ва айтилган пулни берган, — дейилади тергов ҳужжатларида.