Польша прокуратураси терговчилари Украина чегарасидан етти километр узоқликдаги Польшанинг Пржеводов қишлоғига қулаган ракета Украинанинг С-300 ҳаво ҳужумидан мудофаа тизими томонидан учирилган деган хулосага келди. Бу ҳақда манбаларга таяниб, Рзеcзпосполита хабар берди.
Терговчилар Украина мудофаа кучлари “Совет Иттифоқида ишлаб чиқарилган С-300 ракетасини учирган” жойни аниқлади. Улар Россия қўшинлари Пржеводовдан узоқда бўлгани учун ракетани рус ҳарбийлари учиргани эҳтимолини рад этди. Бундан ташқари, ракета Беларусдан учирилиши эҳтимоли текширилмади.
Ракета Польша ҳудудига 2022 йил 15 ноябрда Россия қўшинларининг Украинага, хусусан Лвов вилоятига оммавий ҳужуми чоғида тушган. Оқибатда 59 ва 60 ёшли икки полшалик фермер ракета зарбасидан ҳалок бўлди.
Рзеcзпосполита манбаларининг таъкидлашича, Украина ҳаво ҳужумидан мудофаа кучлари самарадорликни ошириш учун зенит-ракеталарни жуфт-жуфт қилиб ишга туширган — бир ракета нишонга теккан, иккинчиси эса учишда давом этган. Маълум бир баландликда ракетанинг ички механизмлари уни йўқ қилиши керак эди, бироқ бу амалга ошмаган.
Польша Бош прокуратураси матбуот котиби Лукаш Лапчинскийнинг Рзеcзпосполитаъга айтишича, терговчилар иш бўйича хулосалар олган, “лекин уларнинг маҳфийлигини ҳисобга олиб, мазмуни ҳақида хабар бермайди”.
“Ҳозирги босқичда Польша ҳудудида тергов ҳаракатлари тугатилди. Украинага ҳуқуқий ёрдам сўраб мурожаат қилдик ва жавобни кутмоқдамиз”, — деди департамент вакили.
Таъкидланишича, Украина Польша тергови билан ҳамкорлик қилмаган ва ҳеч қандай материал тақдим этмаган.
Изоҳ (0)