Косово шимолидаги отишма оқибатида бир полициячи ҳалок бўлди, яна бири яраланди. Бу ҳақда маҳаллий ҳукумат раҳбари Албин Куртига таяниб, Reuters хабар берди.
Курти тегишли ҳодисани теракт деб баҳолади, шунингдек, ҳужумчилар 30 кишидан ортиқ бўлиб, яхши қуроллангани ва тажрибали жангчилар эканини айтди.
“Айни вақтда полиция ходимларимизга турли калибрли ўқотар қуроллардан ўқ узиш давом этмоқда. Ҳужум қилганлар ниқобли ва қуролланган профессионаллар эди”, — деди Курти.
Reuters агентлигининг Косово хавфсизлик расмийларига таяниб хабар беришича, ҳодиса эрта тонгда Банска қишлоғи яқинидаги кўприкда давлат рақамлари бўлмаган икки машина тўхтаб, ҳаракатланишни тўсганида содир бўлган.
Кўп ўтмай воқеа жойига етиб келган полициячилар ўққа тутилган. Ҳуқуқ-тартибот идоралари ходимларининг сўзларига кўра, ҳужумчилар ихтиёрида нафақат ўқ отиш қуроллари, балки қўл гранаталари ҳам бўлган. Кейинроқ жангарилар маҳаллий монастирда яширинган, Косово полицияси ҳудудни қуршаб олган.
“Қуролли гуруҳлар томонидан ҳужумлар давом этмоқда. Бизнинг кучларимиз камида 30 нафар оғир қуролланган шахсларни қуршаб олди, уларни таслим бўлишга чақираман. Улар бизнинг полицияга ҳужум қилмоқда. Жиноятчилар ва уларнинг раҳбарлари қўлга олинади ва жазоланади”, — деди Курти.
Аввалроқ Сербия президенти Александр Вучич НАТО бош котиби Йенс Столтенбергни Косово ва Метохиядаги серблар хавфсизлигини таъминлашга чақирган эди. У бу БМТ Хавфсизлик Кенгашининг 1244-резолюциясига мувофиқ Альянс кучлари зиммасига юкланганини айтган.
Изоҳ (0)