Тожикистон президенти Эмомали Раҳмон мамлакат Қуронни, шунингдек, бошқа ҳар қандай муқаддас китобларни таҳқирловчи хатти-ҳаракатларни қоралашини маълум қилди. Бу ҳақда у БМТ Бош ассамблеясининг 78-сессиясидаги нутқида гапирди.

“Тожикистон халқларнинг эътиқодлари, жумладан Қуръони Карим ёки инсониятнинг бошқа цивилизациявий ва диний қадриятларига оид ҳар қандай ҳақоратни қоралайди”, — деди Эмомали Раҳмон.

У диндорларнинг ҳис-туйғуларини ҳақорат қилиш, шунингдек, “ҳар қандай дин ва эътиқодга нисбатан нафрат ва зўравонлик фожиали оқибатларга олиб келиши”ни таъкидлади. Раҳмон БМТ минбаридан тинчлик ғояларини илгари суришга чақирди. 

“Биз бағрикенглик ва тинчлик ғояларини тарғиб қилиш провокация, бўлиниш, фанатизм, экстремизм ва радикализмга қарши туришнинг энг яхши воситаси, деб ҳисоблаймиз. Келинг, бизни ажратувчи ҳаракатларга қарши бирлашайлик, бир-биримизни ҳурмат қилиш ва қадр-қимматини тан олишга асосланган жамият сари интилайлик”, — деди президент.

Сиёсатчи ўз нутқини тожик ва форс шоири, мутафаккири Саъдий Шерозий шеъридан мисралар ўқиш билан якунлаган.

Қуръоннинг ёқиб юборилишига оид сўнгги маълумотлар

• Январь ойида Стокгольмдаги Туркия элчихонаси олдида Қуръон ёқиб юборилганди. Акцияни ултраўнг ва исломга қарши “Қаттиқ курс” партиясининг даниялик-швед фаоли Расмус Палудан бошқарган.
• Апрель ойида Швеция маъмурий суди мамлакат Ташқи ишлар вазирлиги томонидан Қуръон ёқиб юборилган намойишларга қўйилган тақиқни бекор қилган. Суд ўз қарорида йиғилишлар ва намойишлар ўтказиш эркинлиги конституциявий ҳимояланган ҳуқуқлар эканини келтирган. 
• Июнь ойида ироқлик муҳожир Стокгольмдаги бош масжид ёнида Қуръонни ёқиб юборган.
• Июль ойида Швеция полицияси Стокгольмдаги Ироқ элчихонаси олдида Қуръон ва Ироқ байроғи ёқиб юборилган норозилик намойишини ўтказишга рухсат берган. Шундан сўнг юзлаб одамлар Швециянинг Бағдоддаги элчихонасига бостириб кириб, бинога ўт қўйган. 
• Намойишчиларни тарқатиш учун Ироқ полицияси сув пуркагичлардан фойдаланган. Ироқ мамлакатдан Швеция элчисини ҳайдаган ва яна муқаддас китоб ёқиб юборилса, дипломатик алоқаларни узишини билдирган.  Шундан сўнг Ироқнинг Даниядаги элчихонаси олдида Қуръон ёқиб юборилган. Намойишчилар буни Швециянинг Бағдоддаги элчихонасига яқинда уюштирилган ҳужумга норозилик сифатида амалга оширганини айтган.
• Август ойи бошида Стокгольмда эронлик аёл полиция ҳимоясида Маларен кўли қирғоғида мангалда Қуръонни ёқиб юборган. У “барча динларни йўқ қилиш” кераклигини айтган.
• Август ойи ўрталарида Швециянинг Стокгольм шаҳрида полиция ҳимояси остида яна муқаддас Қуръон китоби ёқиб юборилди. Бунинг олдини олишга уринган эркак эса ҳибсга олинди. Намойишга ироқлик муҳожирлар бошчилик қилган. Улар аввал Қуръон нусхасини тепиб, устига сакраган, кейин эса уни бутунлай ёқиб юборган.