Бухоро вилоятининг Ғиждувон туманида МИБ ходимининг хизмат вазифасини бажаришига тўсқинлик қилган муштумзўр фуқарога жиноят иши қўзғатилди. Бу ҳақда вилоят прокуратураси матбуот хизмати хабар берди.
Аниқланишича, МИБ Ғиждувон тумани бўлими давлат ижрочиси З.З. иш юритувида қарздор “Файзулло Хубиддин Файз-бир” МЧЖдан “Ҳудудгазтаъминоти” АЖ фойдасига газ бўйича коммунал қарздорлик ҳамда давлат фойдасига солиқ ва бошқа мажбурий тўловларни ундириш ҳақидаги ижро иши бўлган.
Мазкур ижро иши бўйича ижро ҳаракатларини амалга ошириш учун МИБ ходими 14 сентябрь куни қарздор фуқаро М.Ф. хонадонига борганида, у ижро ҳаракатларини амалга оширишига тўсқинлик қилиб, қўллари билан ходимнинг юз ҳамда баданининг турли соҳаларига қасддан урган.
Бундан ташқари, ерда ётган арматура билан ходимнинг Lacetti машинаси олд, орқа, ўнг ён томон олд ва орқа ойналарини синдириб, орқа ўриндиғига ўт қўйиб, қасддан шикаст етказган.
Мазкур ҳаракатлари учун қарздор М.Ф. шу куннинг ўзида Жиноят кодексининг 140-моддаси 3 - қисми “а” банди, 173-моддаси 3-қисми “а” банди ва 219-моддаси 2-қисми билан ишда айбланувчи тариқасида жалб қилиниб, қамоққа олиш тарзидаги эҳтиёт чораси қўлланган.
Вилоят прокуратураси томонидан мазкур жиноят иши тергови алоҳида назоратга олинган.
Изоҳ (0)