Бугун, 18 сентябрь куни UzAuto Motors расмий сайтида кўрсатилган комплектация ва ранглардаги Chevrolet Cobalt, Lacetti, Damas ва Лабо автомобиллари учун контрактация очилган эди.
Шундан сўнг кўришлар сони кўпайгани сабабли компаниянинг расмий сайтида узилишлар кузатила бошланди. Ижтимоий тармоқларда мазкур эълондан сўнг автосалонларда навбатлар юзага келгани акс этган видеолар тарқалди.
Шунингдек, тармоқларда Cobalt ва Lacetti учун шартнома бериш тўхтатилгани ҳақида хабарлар тарқалди. “Дарё” бунга аниқлик киритиш мақсадида “ЎзАвтосаноат” матбуот котиби билан боғланди. Маълум қилинишича, ҳозирда Cobalt ва Lacetti учун шартнома бериш тўхтатилди. Зумрад Шожалилованинг таъкидлашича, 18 сентябрь куни ушбу моделлардаги автомобилларга жами 28 мингдан зиёд шартнома тузилган.
Аввалроқ UzAuto Motors 4 август куни ишлаб чиқариш линияларида амалга оширилган модернизация ишлари, шунингдек, завод фаолияти самарадорлигининг ошиши ҳисобига 2023 йилда қўшимча 50 000 дона автомобиль ишлаб чиқариш имконияти яратилганини маълум қилган эди. Эртасига, 5 августда эса шартнома бериш тўхтатилгани маълум қилинганди.
Унга кўра, Chevrolet Lacetti, Cobalt ва Damas автомобилларининг 2023 йил учун қўшимча партиясига контрактациянинг дастлабки 2 кунида тўлиқ шартнома тузилди. 4–5 август кунлари ушбу автомобиль моделларини харид қилиш учун 50 000 дан ортиқ шартнома имзоланганди.
Изоҳ (0)