Ҳар йили дунёдаги энг нуфузли 50 яҳудий рўйхатини тузадиган Исроилнинг Тhе Jerusalem Post газетаси 2023 йилги рейтингга “Вагнер” асосчиси Евгений Пригожинни киритди.
Россиялик тадбиркор “посцкриптум” белгиси билан асосий рўйхатдан ташқарида 52-ўринни эгаллаган. Биографик маълумотда Пригожин “2016 йилги АҚШ президентлик сайловларига аралашиш учун ресторан империяси ва трол фабрикасини яратгани” ёзилган. Бироқ Пригожиннинг “Вагнер” билан боғлиқ фаолияти унга дунё миқёсида шуҳрат келтиргани таъкидланган.
Газетанинг иддао қилишича, 23 август куни авиаҳалокатда ўлган 62 ёшли Пригожиннинг отаси яҳудий бўлган ва Исроилга қочоқларни қайтариш ҳуқуқига эга эди. Рейтингнинг 2023 йилдаги етакчиси Американинг OpenAI компанияси раҳбари Сем Алтман бўлди. Иккинчи ва учинчи ўринларни Исроил бош вазири Биньямин Нетаньяху ва АҚШ Давлат котиби Энтони Блинкен эгаллади.
Рейтингнинг 22-қаторига россиялик тадбиркор Роман Абрамовични Исроил “Дўстлик жамғармаси” президенти Яел Экштейн билан бирга жойлаштирди ва уларни Украинани қўллаб-қувватловчи яҳудийлар деб атади. Рўйхат муаллифларининг таъкидлашича, санкцияларга қарамай, Абрамович “Россия ва Украина ўртасидаги тинчлик музокараларига ёрдам берувчи бетараф томон сифатида парда ортида ҳал қилувчи рол ўйнаган”.
2022 йилги энг нуфузли яҳудийлар рейтингида биринчи ўринни Украина президенти Владимир Зеленский эгаллаганди. Кейинчалик у иккинчи ўринга ўтказилиб, етакчилик Исроил бош вазири Яир Лапидга берилган. 2023 йилда нашр Украина раҳбарини рўйхатга киритмади.
Изоҳ (0)