Американинг RTХ компанияси Саудия Арабистонининг Scopa Defense фирмаси билан миллиардлаб долларлик қурол сотиш бўйича музокаралар олиб борди. Аммо фойдали келишув 2023 йил бошида тўсатдан барбод бўлди, деб ёзмоқда Тhе Wаll Street Journal.
Хабарга кўра, саудиялик ҳамкорлар бир вақтнинг ўзида Вашингтон санкциялари остида бўлган Хитой ва Россия компаниялари билан шартномалар тузаётгани маълум бўлгач, Америка томони келишувдан воз кечган.
RТХ ва Scopa 2022 йили Саудия Арабистонида ракета ва дронлардан ҳимоя қилувчи мураккаб ҳаво мудофаа тизимларини ишлаб чиқарадиган завод қуришга келишиб олган. Режага кўра, 20,7 квадрат метр майдонни ҳимоя қиладиган, турли ўлчамдаги, тезлик ва баландликдаги нишонларни ушлаб олишга қодир радарлар ва бир нечта ҳаво мудофаа тизимларини бирлаштиришни назарда тутган.
Тизим “кўп мақсадли батарея” деб номланган. RТХ ва Scopa ўртасидаги қўшма корхона 25 миллиард долларлик инвестиция ва 17 миллиард долларлик сотувларни ўз ичига олган, нашр бу режаларни “мегабитим” деб атайди.
Scopa Саудия Арабистонида НАТОнинг кўплаб қуролларини ишлаб чиқаришни режалаштирган, бу халқаро қурол савдоси қоидалари билан ҳимояланган технологияларга киришни англатади. WSJ манбалар ва ҳужжатларга асосланиб, Scopa асосчисининг яна икки компанияси Россия, Беларусь ва Хитойнинг санкцияланган фирмалари билан бизнес юритишга уринганини ёзади; Айнан мана шу алоқалар RТХда хавотир уйғотган.
Scopa компания эгаси ва санкциялар ҳақида хавотир билдирган бош директорини ишдан бўшатган. Scopa эгаси Моҳамед Алажланнинг айтишича, у Россия компаниялари билан бизнес юритмайди, Хитой компаниялари билан эса фақат мис, каучук ва бошқа хом ашё сотиб олиш билан чекланади.
У RТХ’нинг мунозарани тугатиш қарорини “шошилинч, мантиқсиз ва ҳатто иррационал” деб атаган. Шунга қарамай, яна бир қанча Ғарб компаниялари ҳам Scopa билан ҳамкорлик қилишдан бош тортган. Улар орасида Италиянинг Beretta Defence Technologies ва Finsantieri кемасозлик компанияси бор. WSJ манбаларининг қайд этишича, сабаблардан бири Россия ва Хитой билан ҳамкорликка оид хавотирлардир.
Изоҳ (0)