“Уруш узоқ давом этмайди”: Буданов сабабини айтди

Украина разведкаси раҳбари Кирилл Буданов Россия билан яна қанча жанг қилишига тўғри келиши ҳақидаги шахсий фикри билан ўртоқлашди. 

Унинг сўзларига кўра, ҳарбий ҳаракатлар узоқ давом эта олмайди, чунки рус ҳарбийлари урушнинг узоқ вақт давом этишига “жисмонан чидай олмайди”. 

“Мен бу узоқ давом этадиган уруш бўлади деган фикрга қўшилмайман. Бу менинг шахсий фикрим бўлиб, биринчи навбатда, душманга оид маълумотлар таҳлилига асосланган”, — деди Украина разведкаси раҳбари.

Бироқ Кирилл Буданов ҳар кимнинг “узоқ муддатли” тушунчаси борлигини қўшимча қилди. 

“Россия билан уруш яна олти, етти ой ёки бир йил давом этиши мумкин. Баъзилар учун бу узоқ вақт. Агар бу узоқ муддат деб ўйласангиз, унда сиз ҳақ бўлишингиз аниқ”, — деди у.

Шунингдек, Буданов Украина Қуролли кучлари қиш бошланганидан кейин ҳам қарши ҳужумни давом эттиришини айтди.

“Совуқ, нам ва лойда жанг қилиш қийинроқ. Жанглар, қарши ҳужум давом этади”, — деди Украина разведкаси раҳбари Кирилл Буданов.