Россияда “Роскомнадзор” сўровига кўра, 2023 йилнинг январидан июнигача қонун билан тақиқланган маълумотларга эга бўлган 885 мингдан ортиқ сайт блокланди ёки ўчирилди, дея хабар берди “Коммерсант”.
Бу кўрсаткич 2022 йилнинг биринчи ярмига нисбатан 85 фоизга кўп, деб ёзди нашр.
Бундай динамика ўтган йили интернет-ресурсларни блокировка қилиш учун асосларнинг кенгайиши, шу билан бирга, Россия армияси ҳақидаги фейк маълумотларнинг тарқалишини тақиқлаш билан боғлиқ.
Бундан ташқари, интернет тармоғида блокланган ёки ўчирилган алоҳида материаллар сони 1,1 миллионга етди, бу бутун 2022 йилга нисбатан 10 фоизга кўпдир.
Уруш бошланганидан бери минглаб веб-сайтлар блокланган
2022 йил февралида Россия ҳарбийларининг Украинага бостириб кириши бошланганидан бери “Роскомнадзор” Россиядаги минглаб веб-сайтларни, жумладан, кўплаб мустақил оммавий ахборот воситалари, Facebook, Instagram ва Twitter ижтимоий тармоқларини блоклади.
Тасдиқланмаган маълумотларга кўра, блокировка YouTubeъга ҳам таъсир қилиши мумкин. Бир неча кун олдин Россия ҳукумати блоклашни четлаб ўтиш учун VPN’дан фойдаланиш бўйича кўрсатмаларга эга бўлган ресурсларни блоклашни таклиф қилди.
Изоҳ (0)