Украинанинг Коррупциянинг олдини олиш бўйича миллий агентлиги (НАЗК) коррупцияга оид ҳуқуқбузарликларни содир этган жисмоний ва юридик шахсларнинг махсус реестрини кўришни барча учун очиқ қилиб қўйди. Бу ҳақда агентлик раҳбари Александр Новиков маълум қилди.
НАЗК маълумотларига кўра, шахсларнинг ягона давлат реестри коррупцияга оид ҳуқуқбузарликларни содир этган барча жисмоний ва юридик шахслар тўғрисидаги маълумотларни ўз ичига олган порталдир. Реестр 2019 йил февраль ойида яратилган.
“НАЗК хавфсизлик жиҳатларини ҳисобга олган ҳолда коррупция ва коррупция билан боғлиқ ҳуқуқбузарликларни содир этган шахслар реестрини кўришни барча учун очиб қўйди. Миллий агентлик Украина Мудофаа вазирлигидан реестрга киришда ҳеч қандай хавф йўқлиги ҳақида жавоб олди”, — деди Новиков.
Қайд этилишича, Украинада ўтган йилнинг февраль ойидан бошлаб ҳарбий ҳолат жорий этилиши муносабати билан реестрга кириш чекланган эди. Новиковнинг сўзларига кўра, реестр маълумотларига киришнинг барча учун қайта очилиши “жамоат манфаати” билан боғлиқ бўлиб, “коррупцияга қарши кучли восита”дир.
Рўйхатга олиш китобида бирор юридик шахснинг коррупцияга оид ҳуқуқбузарлик учун жавобгарликка тортилгани ёки тортилмагани тўғрисида маълумотнома олиш мумкин. Миллий агентлик мансабдор шахслар мақоми тўғрисидаги электрон декларацияни тиклашни назарда тутувчи қонун лойиҳасининг парламент томонидан қабул қилинишини кутмоқда, дея тушунтирди Александр Новиков.
Изоҳ (0)