Ўзбекистонда 24 йил ичида ярим миллион нафардан ортиқ аёлларга 54 ёшдан ёшга доир пенсия тайинланган. Бу ҳақда Пенсия жамғармаси маълум қилди.
Жамғарма хабарига кўра, 1999 йил 1 июлдан 20 йиллик меҳнат стажига эга бўлган аёлларга 54 ёшдан, яъни умумий белгиланган ёшдан 1 йил олдин ёшга доир пенсия тайинлаш йўлга қўйилган.
Ҳисоб-китобларга қараганда, 1999 йил 1 июлдан 2023 йил 1 августга қадар 555 минг 385 нафар аёлларга 54 ёшдан ёшга доир пенсия тайинланган. Шундан белгиланган муддатидан бир йил аввал тайинланган пенсия 2022 йилда энг кўп (41 710 нафар) қайд этилган. Энг кам кўрсаткич эса 1999 йилда — 4 минг 960 нафар аёллар 54 ёшдан ёшга доир пенсияга чиққан.
Жорий йилнинг январь—июль ойларида 22 минг 638 нафар аёлга 54 ёшдан ёшга доир пенсия берила бошланган.
Эслатиб ўтамиз, Ўзбекистонда 20 йилдан кам меҳнат стажига эга бўлган аёлларга қонунчиликка мувофиқ, 55 ёшдан умумий асосларда ёшга доир пенсия тайинланади.
Маълумот учун, бугунги кунда мамлакатда пенсия олувчилар сони 3,8 миллион нафардан ортиқни (1 июль ҳолатига) ташкил этади. Шундан ёшга доир пенсия олувчилар 3,2 миллион нафардир. Ҳозирда давлат пенсияларининг барча турлари учун йиллик 53,5 триллион сўм тўланмоқда. Бунда бир ойлик ўртача харажатлар миқдори 4,5 триллион сўмни ташкил этади.
Изоҳ (0)