Америка урушни ўрганиш институти ( ISW) таҳлилчилари “Вагнер” раҳбари Евгений Пригожин оммага кўриниш бермаётганига ва урушга муносабат билдиришни тўхтатганига эътибор қаратди.
Мутахассислар фикрича, Пригожин июнь ойидаги муваффақиятсиз исёндан сўнг деярли жамоат жойларида кўринмаяпти. Бироқ у Африка қитъасидаги “Вагнер” бўйича саволларга муносабат билдиришда давом этмоқда.
“ ‘Вагнер’га алоқадор Telegram канали 15 август куни Пригожиннинг аудиоёзувини эълон қилди. Унда у Ганада ‘Вагнер’ футболкаларини кийган намойишчилар ҳибсга олиниши эҳтимоли ҳақида гапирган. Пригожин бу Африкада ва бутун дунёда ‘Вагнер’ни қўллаб-қувватлашаётганидан далолат беришини айтган”, — дейди таҳлилчилар.
8 август куни “Вагнер”га алоқадор каналлар Пригожин Нигердаги давлат тўнтариши ва “Вагнер”нинг Африкада мавжудлигини муҳокама қилган аудиоёзувни эълон қилган.
Ўз навбатида, Украинага қарши урушда катта рол ўйнаган “Вагнер” раҳбари фронтдаги вазиятга изоҳ беришдан ўзини тиймоқда.
“Афтидан, Пригожин Украинадаги вазиятни ёки ‘Вагнер’нинг Россия ва Беларусдаги фаолияти ҳақида гапириш ўрнига ‘Вагнер’нинг Африкадаги манфаатларини қўллаб-қувватлаш учун ўзининг чекланган оммавий мурожаатларидан фойдаланмоқда. Бу унинг Украина билан урушда иштирок этишига, ҳатто риторик жиҳатдан ҳам чекловларга риоя қилишини кўрсатиши мумкин”, — дея хулоса қилди ISW таҳлилчилари.
Россияда исёнга уриниш ёхуд Пригожин исёни
2023 йил 23—24 июнь кунлари Россияда “Вагнер” хусусий ҳарбий кампанияси раҳбари Евгений Пригожин томонидан исён кўтаришга уриниш бўлди. Хусусан, Пригожин “Адолат марши”ни бошлаганини, унинг мақсади Москвага етиб бориш эканини айтди.
У рус ҳарбийларини Россия мудофаа вазири Сергей Шойгу ва Бош штаб бошлиғи Валерий Герасимов буйруғи билан “Вагнер” лагерларига ҳужум қилганликда айблади.
Қўзғолон пайтида Ростов-Дон ва Воронеж қўлга олинди, бир нечта вертолётлар ва ҳарбий самолётлар уриб туширилган, оқибатда камида ўн нафар рус ҳарбийси йўқ қилинган.
Россия президенти Владимир Путин Пригожинни давлатга хиёнатда айблади. Бироқ кечқурун, Беларусь раҳбари Александр Лукашенко билан музокаралардан сўнг Пригожин ўз жангариларининг Москвага юришини тўхтатди.
Кремль Пригожинга қарши қуролли исён бўйича жиноий иш тўхтатилиши, “вагнерчи”лар жиноий жавобгарликка тортилмаслиги ва Пригожиннинг ўзи Беларусга кетиши мумкинлигини билдирди.
Бир неча кундан сўнг Путин ўз армияси ва хавфсизлик кучларига исённинг олдини олгани учун миннатдорлик билдирди.
Изоҳ (0)