Швециянинг Стокгольм шаҳрида полиция ҳимояси остида яна муқаддас Қуръон китоби ёқиб юборилди. Бунинг олдини олишга уринган эркак эса ҳибсга олинди. Бу ҳақда маҳаллий манбаларга таяниб, “Российская газета” хабар берди.
Маълум қилинишича, акция парламент биносидан унча узоқ бўлмаган жойда бўлиб ўтган. Унга ироқлик муҳожирлар Салван Момика ва Салван Нажем бошчилик қилган. Улар аввал Қуръон нусхасини тепиб, устига сакраган, кейин эса уни бутунлай ёқиб юборган.
Бундай ҳаракатларга қарши чиққанлардан бири акция иштирокчилари олдига югуриб келиб, уларни террорчилар деб атаган. Шундан сўнг эркак қўлга олинган. Бу Швецияда муқаддас китоб ёқиб юборилган биринчи ҳолат эмас. Қуйида бу бўйича батафсил маълумот келтирамиз.
Қуръоннинг ёқиб юборилишига оид сўнгги маълумотлар
- Январь ойида Стокгольмдаги Туркия элчихонаси олдида Қуръон ёқиб юборилганди. Акцияни ултраўнг ва исломга қарши “Қаттиқ курс” партиясининг даниялик-швед фаоли Расмус Палудан бошқарган.
- Апрель ойида Швеция маъмурий суди мамлакат Ташқи ишлар вазирлиги томонидан Қуръон ёқиб юборилган намойишларга қўйилган тақиқни бекор қилган. Суд ўз қарорида йиғилишлар ва намойишлар ўтказиш эркинлиги конституциявий ҳимояланган ҳуқуқлар эканини келтирган.
- Июнь ойида ироқлик муҳожир Стокгольмдаги бош масжид ёнида Қуръонни ёқиб юборган.
- Июль ойида Швеция полицияси Стокгольмдаги Ироқ элчихонаси олдида Қуръон ва Ироқ байроғи ёқиб юборилган норозилик намойишини ўтказишга рухсат берган. Шундан сўнг юзлаб одамлар Швециянинг Бағдоддаги элчихонасига бостириб кириб, бинога ўт қўйган.
- Намойишчиларни тарқатиш учун Ироқ полицияси сув пуркагичлардан фойдаланган. Ироқ мамлакатдан Швеция элчисини ҳайдаган ва яна муқаддас китоб ёқиб юборилса, дипломатик алоқаларни узишини билдирган. Шундан сўнг Ироқнинг Даниядаги элчихонаси олдида Қуръон ёқиб юборилган. Намойишчилар буни Швециянинг Бағдоддаги элчихонасига яқинда уюштирилган ҳужумга норозилик сифатида амалга оширганини айтган.
- Август ойи бошида Стокгольмда эронлик аёл полиция ҳимоясида Маларен кўли қирғоғида мангалда Қуръонни ёқиб юборган. У “барча динларни йўқ қилиш” кераклигини айтган.
Изоҳ (0)