Сурхондарёда 1 млн долларлик кредит маблағлари талон-торож қилинди

Қорақалпоғистон Республикаси, Сурхондарё ва Сирдарё вилоятларида кредит маблағларини талон-торож қилиш ҳолатлари аниқланди, деб хабар беради Бош прокуратура ҳузуридаги департамент.

Бош прокуратура ҳузуридаги департаментнинг Қумқўрғон туман бўлими томонидан терговга қадар текширув ўтказилган. Текширув давомида “С.Л.” ва “Қ.Т.” МЧЖ норасмий раҳбари У.Ж. ва бошқалар тижорат банки хизматлар марказидан “С.Л.” МЧЖга лимончилик учун иссиқхона қуриш мақсадида ажратилган кредитни “Қ.Т.” МЧЖга ўтказгани аниқланган. Улар амалда замонавий иссиқхона ташкил этмасдан, сохта ҳужжатлар орқали ушбу маблағни лизинг тўловлари ва бошқа мақсадларга йўналтириш орқали жами 1 миллион долларлик маблағларни ўзлаштириш йўли билан талон-торож қилган.

Шу каби, департаментнинг Боёвут туман бўлими томонидан ўтказилган терговга қадар текширувда “Ф.А.” ХК масъул шахслари ва бошқалар тижорат банки филиалидан хусусий корхонага ишлаб чиқариш ускуналарини сотиб олиш мақсадида ажратилган 912 миллион сўм кредитни бошқа МЧЖнинг ҳисоб рақамига ўтказиб, нақдлаштириш йўли билан талон-торож қилганликлари аниқланган.

Департаментнинг Қўнғирот туман бўлими томонидан ўтказилган терговга қадар текширувда “Қоратол” МФЙ бўйича собиқ ҳоким ёрдамчиси Ш.А. 18 нафар фуқаро номига чорвачилик ва қишлоқ хўжалиги техникаси учун имтиёзли кредит ажратилишига эришиб, расмий ҳужжатларга сохта маълумотлар киритиш орқали жами 571,3 миллион сўмни нақдлаштириб олгани аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) билан жиноят ишлари қўзғатилиб, тергов ҳаракатлари ўтказилмоқда.

Кредит маблағларининг ўзлаштирилиши

Февраль охирларида Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Май ойида эса Сурхондарё ва Фарғонада оилавий корхоналар раҳбарлари 1,2 миллиард сўмдан ортиқ имтиёзли кредитларни талон-торож қилгани тўғрисида хабар берилган эди. Шунингдек, Қорақалпоғистонда давлат дастури доирасида ажратилган кредит маблағлари талон-торож қилингани маълум бўлганди.