Афғонистон саноат ва савдо вазири Алҳажи Нуруддин Азизий Қозоғистондан импорт қилинадиган буғдой ва унга чегирма беришни сўради. Бу ҳақда Tengrinews хабар берди.
Остонада бўлиб ўтган бизнес-форумда сўзга чиққан Афғонистон саноат ва савдо вазири қисқа вақт ичида ўнлаб маҳаллий маҳсулотлар ишлаб чиқарилиши эвазига мамлакат ўзини ўзи тўлиқ таъминлашга эришганини айтди.
“Биз Қозоғистондан Афғонистоннинг маҳаллий саноатини қўллаб-қувватлаш мақсадида экспорт қилинадиган афғон товарларига имтиёзли тариф қўллашни сўраймиз. Шунингдек, Афғонистон аҳолиси ва хусусий секторини қўллаб-қувватлаш мақсадида сиздан буғдой ва ун нархига махсус чегирмалар беришингизни сўраймиз”, — деган вазир.
Қозоғистон ва Афғонистон ишбилармонлари ўртасида 190,8 миллион долларлик 15 та шартнома имзоланган. Қозоғистон Афғонистонга қишлоқ хўжалиги маҳсулотлари, ун ва ўсимлик ёғи етказиб беради. Афғонистон Қозоғистон ўсимлик ёғини импорт қилувчи бешта йирик давлатдан бири. Имзoланган шартномаларнинг 9 таси ёғ етказиб беришга алоқадор.
Изоҳ (0)