Беларусда украиналик болалар ғойиб бўлмоқда — ОАВ

Украинанинг Россия томонидан аннексия қилинган ҳудудларидан болалар Беларусдаги соғломлаштириш лагерларига “таътилга” жўнатиляпти, бироқ уларнинг ҳаммаси ҳам ортга қайтмаяпти, баъзилари Россия ҳудудида ғойиб бўлмоқда. Бу ҳақда мухолифатдаги Инқирозга қарши халқ бошқаруви раҳбари ва Беларуснинг ўтиш даври қўшма вазирлар маҳкамаси вакили Павел Латушко “Дожд” телеканалига берган интервьюсида айтди.

“Охирги маълумотлар Украинанинг эгаллаб олинган ҳудудига қайтмаган етим болаларга тааллуқли. Улар ғойиб бўлган, яъни Россия ҳудудида изсиз йўқолган. Уларнинг ҳозир қаерда экани ҳақида бошқа маълумот беролмаймиз”, — дейди Латушко.

У қанча украиналик бола шу тарзда ғойиб бўлган бўлиши мумкинлигига аниқлик киритмади.

Мухолифатчи сиёсатчининг айтишича, ҳуқуқ ҳимоячилари Беларусга олиб кетилган украиналик болаларни юзларидан аниқлаяпти. Бугунги кунга қадар улар 16 нафар етим боланинг шахсини аниқлади.

“Аммо бу фақат бошланиши. Афсуски, уларнинг сони икки юзга яқин бўлиши мумкин, деб айта оламиз”, — деди Латушко.

Аннексия қилинган ҳудудларнинг Россия томонидан тайинланган “маъмуриятлари” меҳрибонлик уйларидаги етим болалар реабилитация учун Беларусга олиб кетилаётганини даъво қилмоқда. Июнь ойида Россия ва Беларусь иттифоқ давлати котиби Дмитрий Мезенсев қўшиб олинган ДХР ва ЛХРдан 2 000 дан ортиқ болалар ота-оналари ёки васийларининг розилиги билан Минск вилоятидаги санаторийга “дам олишга” кетганини айтди.

18 июль куни Европарламент депутатлари Беларусь раҳбари Александр Лукашенкони ҳибсга олишга ордер бериш талаби билан Гаагадаги Халқаро жиноий судга (ХЖС) мурожаат қилди. Европарламентнинг халқаро ишлар бўйича қўмитаси томонидан қабул қилинган ҳужжатда Украинага етказилган зарар ва унинг ҳудудида содир этилган жиноятлар учун Беларусь ҳам жавобгар экани айтилади. Бундан ташқари, Европарламент депутатлари украиналик болаларни ноқонуний депортация қилишда Лукашенконинг ролига ишора қилган.

Эслатиб ўтамиз, март ойида Халқаро жиноий суд Россия президенти Владимир Путинни ҳибсга олишга ордер берганди. У аннексия қилинган ҳудудлардан болаларни Россияга ноқонуний депортация қилишда гумонланган. Худди шундай ордер Россиянинг болалар ҳуқуқлари бўйича ваколатли вакили Мария Лвова-Беловага нисбатан ҳам чиқарилган.