Россия томонидан аннексия қилинган Қрим футбол клублари Россия Иккинчи лигасидаги иштирокини бошлади. Украина футбол ассоциацияси (УФА) УЕФА ва ФИФАни Россия футбол иттифоқига (РФИ) нисбатан чора кўришга чақирди.
Россияда 16 июль куни Иккинчи лиганинг 1-тур баҳслари старт олди. Унда Қримнинг “Рубин Ялта” ва “Севастопол” клублари ўйинларда майдонга тушди. Шу тариқа Қрим клублари 2014/15 йилги мавсумдан кейин илк бор Россия чемпионатларида иштирок этди.
РФИ 2014/15 йилги мавсумда Қримнинг учта клубига мамлакат биринчиликлари ва кубок ўйинларида иштирок этишга рухсат берганди. 2014 йилнинг 4 декабрида УЕФА Ижроқўм йиғилишида 2015 йил 1 январидан бошлаб Қрим клубларининг Россия чемпионатларида иштирок этишини тақиқлаш борасида қарор чиқарган. 23 январь куни эса РФИ Қрим клубларини мусобақалардан четлатишга мажбур бўлганди.
Биз Россия футбол иттифоқи Украина клубларини Россия мусобақаларига қўшишга ҳаракат қилаётгани борасида бир неча бор ФИФА ва УЕФАга мурожаат йўлладик. Бу масала борасида яна сизларга юзланамиз ва мавжуд қоидаларни бузаётган Россиянинг бу ҳаракатига чора кўришингизни сўраймиз.
УФАнинг кўплаб шикоятларига қарамай 16.07.2023 санада “Севастопол” ва “Рубин Ялта” жамоалари Россия Иккинчи дивизионидаги биринчи ўйинини ўтказди.
Биз бу ҳаракатни ФИФА ва УЕФА низоми ҳамда УЕФАнинг Қрим футболи борасидаги махсус қоидаларининг қўпол тарзда бузилиши деб баҳолаймиз.
УФА яна ФИФА ва УЕФАга мурожжат қилади ва РФИнинг ФИФА ҳамда УЕФА аъзолигидан чиқариб юбориш имкониятини кўриб чиқишни сўрайди, — дейилади мурожаатда.
УЕФА июнь ойи охирида Қрим клубларига огоҳлантириш берган ва жамоаларга РФИ мусобақаларида иштирок этиш тақиқланишини эслатиб ўтганди.
ФИФА ва УЕФА Россияни аъзоликдан чиқариб ташлаган тақдирда терма жамоа ўртоқлик ўйинлари ўтказа олмайди, рус клублари эса халқаро трансфер тизимидан чиқариб юборилади ва клублардаги барча футболчилар шартномани бир томонлама бекор қилиш ҳуқуқига эга бўлади. Шунингдек, Россия ФИФА ҳамда УЕФА томонидан футбол ривожи учун ажратиладиган ёрдам пулларидан қуруқ қолади.
Изоҳ (0)