Яқинда қайта сайланган Туркия президенти Ражаб Тоййиб Эрдўғон Ҳафиза Гае Эрканни Марказий банк раҳбари лавозимига тайинлади.
Туркия тарихида биринчи марта бу лавозимни аёл киши эгаллади. Гае Эркан Принстонда таҳсил олган, узоқ вақт АҚШда яшаган ва Goldman Sachs, Marsh McLennan вa First Republic Bank каби компанияларда ишлаган.
Ҳозир экспертлар сўнгги тўрт йил ичида тўрт марта раиси ўзгарган Марказий банкда янги раҳбар қанчалик мустақил сиёсат олиб бориши билан қизиқмоқда.
Эрканнинг Марказий банк раҳбари лавозимига тайинланиши таҳлилчилар томонидан сўнгги кунларда кутилган эди. Ражаб Тоййиб Эрдўғон охирги сайловларда атиги 4 фоиз кўпроқ овоз билан иккинчи турда ғалаба қозонгач, ҳукумат таркибини ўзгартирди. Ўшандаёқ кузатувчилар “Эрдўғон тўлиқ назорат қила олмайдиган ягона муаммо бу — иқтисод” дея қайд этишганди.
Биргина ўтган йилнинг ўзида Туркияда инфляция 86 фоизни ташкил этди. Бунга қарши курашиш учун мамлакат ҳукумати узоқ вақт давомида Марказий банк ставкасини оширмади, балки уни пасайтирди, бу эса кўплаб иқтисодчиларни ҳайратда қолдирди.
Ҳозир кузатувчилар Эркан хонимнинг Марказий банк раҳбари этиб тайинланиши мамлакат раҳбарияти иқтисодий йўналишини ўзгартириб, инфляцияга қарши курашда юқори фоиз ставкаларини қўллашидан дарак эмасми, деган саволни беришмоқда.
Изоҳ (0)