Сейсмик ҳодисаларни ўрганиш билан шуғулланувчи Норвегиянинг NORSAR тадқиқот ташкилоти мутахассислари Херсондаги Каховка ГЭС тўғони бузилган куни станция ҳудудида портлаш содир бўлганини аниқлади. Бу ҳақда ташкилот сайтида хабар берилди.
Минтақавий сейсмик станциялардан олинган маълумотларга кўра, портлаш 6 июнь куни Херсон вақти билан 02:54 (Норвегия вақти билан 01:54) да содир бўлган. ОАВ хабарларида худди шу вақт атрофида тўғон қулагани айтилади.
“Биз портлаш ҳодисасига хос бўлган фокусланган энергия зарбасини кўряпмиз”, — деди NORSAR сейсмологи Вокер Ойе АҚШнинг NPR радиостанциясига берган интервьюсида.
Шу билан бирга NPR мутахассислари портлаш нуқтасини аниқлай олмаганини таъкидламоқда — уларнинг сўзларига кўра, бу Каховка ГЭСдан 20—30 километр радиусда содир бўлган. Ойе радиостанцияга берган изоҳида, бу жойда портлашлар камдан-кам содир бўлишини таъкидлади, шунинг учун буни тасодиф деб ҳисоблаш қийин.
NORSAR қайд этган ҳодисанинг сейсмик магнитудаси 1 дан 2 гача баҳоланади, бундай паст магнитуда қурилма сезгирлиги чегарасида жойлашган. Бу шуни англатадики, ҳодисани батафсил ўрганиш ва портлаш ҳақида қўшимча маълумотларни олиш анча қийин бўлади.
Физик Ричард Кордаро 6 июнь куни Twitterъда Бухарестдаги магнитометр Каховка ГЭС яқинида портлашга ўхшаш сигналларни қайд этганини ёзганди.
Каховка ГЭС вайрон бўлиши
Херсон вилоятининг Россияга қўшиб олинган қисмидаги Каховка ГЭС тўғони 6 июнь куни эрталаб вайрон бўлди — Днепрнинг қуйи оқимига сув қуйила бошланди, оқибатда минглаб турар жой бинолари сув остида қолди.
Россия расмийларининг таъкидлашича, тўғоннинг бузилишига Украина Қуролли кучларининг ўққа тутиши сабаб бўлган. Киев рус ҳарбийлари станцияни ичкаридан портлатганини даъво қилмоқда. Тўғон уруш пайтида етказилган зарар ва Каховка сув омборидаги “мисли кўрилмаган” сув сатҳи туфайли ўз-ўзидан қулаган деган версия ҳам мавжуд.
Изоҳ (0)