Қозоғистон президенти Қосим-Жўмарт Тўқаев Марказий Осиё давлатларини сув муаммосини биргаликда ҳал қилишга чақирди. Бу ҳақда хабар Акорда хабар берди.

“Минтақамизнинг иккита йирик дарёси – Сирдарё ва Амударёдаги сув сатҳи 2050 йилга бориб қарийб 15 фоизга камаяди. Минтақада экологик ҳалокатнинг олдини олиш мақсадида Оролни қутқариш халқаро жамғармасини қўллаб-қувватлаш учун кўпроқ ресурс ажратишга чақирамиз.

Сув муаммоси ва иқлим ўзгариши бир-бири билан чамбарчас боғлиқ. Марказий Осиё — сув хавфсизлигига фақат яқин ҳамкорлик ва самарали танланган қўшма чора-тадбирлар орқали эришиш мумкин бўлган минтақа”, — деди у Остона халқаро форумида сўзлаган нутқида.

Сиёсатчи Марказий Осиёда қурғоқчилик ва сув тошқинлари йилига ялпи ички маҳсулотнинг 1,3 фоизи миқдорида зарар етказиши, экинлар ҳосилдорлиги 30 фоизга пасайиши, бу эса 2050 йилга бориб 5 миллион ички иқлим муҳожирининг пайдо бўлишига олиб келишини билдирди. Тўқаев музликлар юзаси аллақачон 30 фоизга қисқарганини таъкидлади.

Шунингдек, у БМТнинг кўп томонлама ёндашув асосидаги тамойил ва қадриятлари бу муаммони ҳал этишнинг ягона йўли эканини айтди.