Агар Россия армияси Украинага бостириб кирмаганида, Каховка ГЭС вайрон қилинмаган бўларди, шундай экан содир бўлган воқеалар учун Россия Федерацияси жавобгар. Бу ҳақда Оқ уй матбуот котиби Карин Жан-Пьер брифингда маълум қилди.
Унинг таъкидлашича, АҚШ ГЭСнинг бузилиш сабабларини ўрганишда давом этмоқда. Бироқ Жан-Пьернинг сўзларига кўра, агар Россия Украинага ҳужум қилмаганида, бу воқеа содир бўлмасди. Шу сабабли фалокат учун жавобгарлик станцияни назорат қилаётган Россия зиммасига тушади.
“Аслида, нима бўлганини баҳолашда давом этяпмиз. Украиналиклар билан мулоқотдамиз. Биз кўриб турган вайронагарчиликлар юракни эзади. Украина халқига ёрдам бериш учун қўлимиздан келганини қиламиз. Бу тўғон Россия назорати остида эди. Уруш ортидан келган ушбу вайронагарчилик учун ҳам улар жавобгар”, — деди Жан-Пьер.
Эслатиб ўтамиз, 6 июнь куни Херсон вилоятининг Россия томонидан вақтинча босиб олинган қисмида Каховка ГЭС тўғони портлатилди. Сув Днепрнинг қуйи оқимига назоратсиз равишда оқизилган. Украина ва Россия бир-бирини ГЭСни вайрон қилишда айблади. Сув тошқинлари хавфи остида қолган ҳудудлардан аҳоли эвакуация қилинмоқда.
Изоҳ (0)