Россия ҳарбийлари 8 июнь куни Каховка ГЭС портлашидан жиддий зарар кўрган Херсонни ўққа тутди, снарядлардан бири турар жой биносига тушди. Бу ҳақда Украина президенти офиси раҳбари Андрей Ермак хабар берди.
Ермакнинг сўзларига кўра, Россия Қуролли кучлари одамларни сув босган ҳудудлардан эвакуация қилиш вақтида Херсонни ўққа тутмоқда.
“Айни пайтда руслар Херсонни ўққа тутмоқда. Оддий террорчилар”, — деган у.
Воқеа жойида бўлган кўнгиллилар ва журналистлар ҳодиса акс этган видеоларни эълон қилмоқда. Видеолардан бирида айрим снарядлар сувга тушаётганини кўриш мумкин.
Шаҳар ўққа тутилганини Херсон вилояти давлат маъмурияти раҳбари Александр Прокудин тасдиқлади. Унга кўра, рус ҳарбийлари Херсоннинг марказий қисми ва қирғоқбўйи ҳудудларига ҳужум қилмоқда.
Эвакуация вақтидаги ракета ҳужуми оқибатида саккиз киши яраланган. Украина президенти Владимир Зеленский шаҳарни тарк этгач, турар-жойлар дарҳол ўққа тутилгани айтилмоқда.
Зеленскийнинг Херсонга ташрифи
8 июнь куни Украина президенти сув босган Херсон вилоятига борди. Кремль Путинда ҳозир бундай режалар йўқлигини маълум қилди.
У жабрланганларга ёрдам бераётган қутқарувчилар ва кўнгиллиларга миннатдорлик билдирди.
“Кўплаб муҳим масалалар бор: табиий офат оқибатида юзага келган тезкор вазият, аҳолини сув босиш мумкин бўлган ҳудудлардан эвакуация қилиш, тўғон портлашидан кейин юзага келган фавқулодда вазиятни бартараф этиш”, — дейилади Украина президентининг Telegram каналида.
Маълумот учун, Бирлашган миллатлар ташкилоти ва Украина Каховка ГЭСдаги портлашдан сўнг жабрланганларни босиб олинган ҳудудлардан эвакуация қилиш бўйича келишиб олди.
Изоҳ (0)