Андижонда уй ёниши оқибатида икки нафар фуқаро шифохонага ётқизилди

Андижон вилоятида хонадонларнинг бири ёниши оқибатида икки нафар фуқаро шифохонага ётқизилди. Бу ҳақда ФВВ ахборот хизмати хабар берди. 

Унга кўра, 8 июнь куни соат 16:19 да Андижон шаҳар “Ёрбоши” МФЙ Соҳил кўчасида жойлашган уйларнинг бирида ёнғин содир бўлаётгани тўғрисида шаҳар ФВБга хабар тушган. 3 та ёнғин-қутқарув экипажи соат 16:26 да воқеа жойига етиб бориб, ёнғин соат 16:29 да ўраб олинган ва соат 16:34 да ўчирилган.

Ёнғин натижасида уйнинг 70 квадрат метр майдонда том, шифт ва уй  жиҳозлари ёниб зарарланган. Тезкор ҳаракатлар туфайли уйнинг 150 квадрат метр майдони ёнғиндан сақлаб қолинган.

Ҳодиса оқибатида икки нафар фуқаро турли даражада куйиш тан жароҳати олиб, шифохонага  юборилган. Ҳалок бўлганлар йўқ. Ёнғин сабаби ва моддий зарар миқдори аниқланмоқда.