Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси “Дўстлик” боғи яқинида кесилган дарахтлар бўйича маълумот берди.

Қайд этилишича, ижтимоий тармоқларда Тошкент шаҳридаги “Дўстлик” (“Бобур”) боғида дарахтлар кесилгани ҳақида эълон қилинган хабар бошқарма инспекторлари томонидан ўрганилган.

Ўрганиш давомида Яккасарой тумани Шота Руставели кўчаси 20-уйнинг қарама-қарши томонида ноқонуний равишда 2 туп чинор — (диаметри 62,1 ва 61 см бўлган) дарахтлари тегишли рухсатномасиз Яккасарой туман ободонлаштириш бошқармаси ходимлари томонидан таг қисмидан кесиб ташлагани аниқланган.

Ушбу ҳолат билан “Ўсимлик дунёсини муҳофаза қилиш ва ундан фойдаланиш тўғрисида”ги қонуннинг 37-моддаси талаблари бузилган бўлиб, Вазирлар Маҳкамасининг 2022 йил 22 августдаги 464-сонли қарорига асосан ўсимлик дунёсига етказилган зарар ҳисобланганида 191,4 миллион сўмни ташкил этган.

Ҳолат юзасидан тўпланган ҳужжатлар ҳуқуқий баҳо бериш учун прокуратура органига юборилган.

Ноқонуний дарахт кесиш ҳолатлари

Бир неча кун олдин Фарғонадаги чегара пости яқинида 12 туп манзарали дарахт қўпориб ташлангани тўғрисида хабар берилганди. Ўзбекистонда 2022 йил давомида дарахт ва буталарнинг ноқонуний кесилиши ортидан табиатга 10 миллиард сўм зарар етказилган. Ўтган йилда жами 1 777 туп қимматбаҳо ва кўп йиллик дарахтлар кесилган. Вазият таҳлил этилганда, қурилиш объектлари атрофини ўраб олиш натижасида дарахтларнинг қаровсиз қолиши, шикастланиши ва нобуд бўлиш ҳолатлари содир этилаётгани аниқланган.