Telegram’даги “Ғазна” каналида UMS алоқа оператори ўтказган тендер ғолиби рақибларидан бор-йўғи 1 тийин камроқ нарх таклиф қилиб лотни ютиб кетгани ҳақида пост эълон қилинди. “Дарё” мухбири ҳолат юзасидан изоҳ олиш мақсадида ташкилот масъуллари билан боғланди.
3—11 май кунлари ўтказилган тендернинг бошланғич нархи 7 миллиард 470 миллион сўм бўлган. Лот якунлари бўйича ғолиб корхона Наманган шаҳри учун UMS МЧЖнинг МРТТ объектларида намуавий лойиҳалар бўйича металл конструкторлар тайёрлаш, қурилиш-монтаж ишлари ва нофаол инфратузилма объектларини демонтаж қилиш ишларини бажариб бериши керак.
Telegram каналда ёзилишича, тендерда 3 та корхона қатнашган ва Energyson МЧЖ рақибларидан 1 тийин камроқ нарх таклиф қилиб ютиб кетган.
Ҳақиқатдан ҳам, etender.uzex.uz порталининг умумий амалга ошган тендерлар рўйхатидаги қисқача қайдда ушбу тендернинг бошланғич ва шартномавий нархларида бир тийинлик фарқ бор.
Аммо харид протоколида вазият бошқача: учта корхона турлича нархлар таклиф этган ва кўрсаткичлар порталдаги маълумотга тўғри келмайди. Хусусан, ғолиб Energyson МЧЖ 7 миллиард 469 миллион 999 минг 999 сўм 99 тийин эмас, 6 миллиард 669 миллион 642 минг 857 сўм 14 тийин таклиф этган.
Ҳолат юзасидан муносабат олиш мақсадида UMS’нинг ушбу тендер бўйича масъул эксперти Сардор Муратов билан боғландик.
“Протоколда ҳеч қандай муаммо йўқ. Ҳамма турлича нархлар таклиф этган, бошланғич суммадан бир тийинга тушириб ютиб кетиш ҳолати бўлмаган, ғолиб деб топилган корхона ҳам 6,6 миллиард сўм атрофида нарх таклиф қилган. Ва ҳали ҳеч қандай келишув имзолангани йўқ, жараён якунланса, албатта, файлларни порталга жойлаймиз”, — дея тушунтирди у.
Изоҳ (0)