Британиянинг МI6 разведкаси раҳбари Ричард Мур Twitter’даги саҳифасида Туркиянинг янги ташқи ишлар вазирини табриклаш учун адашиб фейк аккаунтни белгилади.
Туркиянинг қайта сайланган президенти Ражаб Тоййиб Эрдўғон якшанбага ўтар кечаси мамлакатнинг янги вазирлар маҳкамаси таркибини эълон қилди, унда аввалги таркибдаги вазирлар деярли йўқ.
Туркия ташқи ишлар вазирлигининг янги раҳбари этиб аввал Миллий разведка ташкилоти раҳбари лавозимини эгаллаб келган 55 ёшли Ҳакан Фидан тайинланди. Фидан 9 йилдан ортиқ вазирлик қилган ва ҳозирда Анталия вилоятидан депутат этиб сайланган Мевлут Чавушўғли ўрнини эгаллади.
Мур профилида пародия аккаунт эканлиги ёзиб қўйилган аккаунтни белгилаб, “Кўп йиллик дўстим ва ҳамкасбимга янги лавозимида муваффақиятлар тилайман. Вазирга омад тилайман!”, — деб ёзган.
Хабар берилишича, Туркиянинг янги ТИВ раҳбари Ҳакан Фиданнинг ҳозирда ижтимоий тармоқда расмий аккаунти йўқ.
Изоҳ (0)