Нукусда келини ва қудасини ўлдирган эркакка суд ҳукми ўқилди

Қорақалпоғистоннинг Нукус туманида фарзандини қайтариб олишга борган аёл ва унинг онаси қайнотаси томонидан ўлдирилгани ҳақида хабар берилган эди. Олий суднинг маълум қилишича, мазкур эркакка суд ҳукми ўқилди. 

Нукус туманида яшовчи С.К. исмли аёл 2022 йил 10 июнь куни қайнотаси Й.С. билан ўзаро жанжаллашиб, онаси Ш.К.нинг уйига аразлаб кетиб қолган. Шу йили 11 июнь куни соат 14:00 ларда аёл онаси Ш.К. ва янгаси Ж.А. билан бирга қайнотаси билан қолган вояга етмаган фарзандини (2020 йилда туғилган) олиб кетиш учун борган.

Ўртада келиб чиққан жанжал туфайли Й.С. қўлидаги темир жисм билан С.К. ва унинг онаси Ш.К.ни уриб, қасддан ўлдирган. Шундан кейин улар билан бирга келган фуқаро Ж.А.нинг бош ва юз қисмларига ҳамда танасининг бошқа жойларига бир неча марта уриб ўлдирмоқчи бўлган вақтда Ж.А. воқеа жойидан қочиб яшириниб, оғир тан жароҳатлари билан Нукус тумани тиббиёт бирлашмасига ётқизилган.

Жиноят ишлари бўйича Нукус туман судининг ҳукми билан икки нафар одамни қасддан ўлдирган шахсга 22 йил муддатга озодликдан маҳрум қилиш жазоси тайинланди