АҚШ Оқ уй Миллий хавфсизлик кенгашининг стратегик алоқалар бўйича координатори Жон Кирби CNN телеканалига берган интервьюсида Украина ёзда қарши ҳужумга ўтиш ниятида эканлигини маълум қилди, деб ёзади “РИА Новости”.

“Биз Украина ёзда ҳужумга тайёргарлик кўраётганда ўзини ҳимоя қилиш учун зарур бўлган ҳамма нарсага эга бўлишини истаймиз. Биз ёзда Украинага ҳарбий техника ва мудофаа тизимларини етказиб беришни давом эттириш ниятидамиз, шу жумладан, яқин келажакда ҳам”, — деди Оқ уй вакили.

Бугун, 31 май куни эрталаб ўтган ҳафтада Киевда бўлган америкалик сенатор Линдси Грем яқин кунларда Украинанинг қарши ҳужуми бошланишини айтган эди. Сенаторнинг сўзларига кўра, Украина президенти Владимир Зеленский унга Украина қуролли кучларининг режалари ҳақида маълумот берган.

29 май куни Украина Қуролли кучлари қуруқликдаги қўшинлари қўмондони Александр Сирский қарши ҳужум вақти “тез орада келишини” айтди. Украина Миллий хавфсизлик ва мудофаа кенгаши котиби Олексий Даниловнинг айтишича, қарши ҳужум “эртага ёки бир ҳафтадан кейин” бошланиши мумкин.

Ўтган ҳафта Украина Бош разведка бошқармаси бошлиғи Кирилл Буданов Украина ҳарбийлари қарши ҳужум учун зарур бўлган минимал миқдордаги қурол-аслаҳа олганини айтди. Украина президенти офиси раҳбари маслаҳатчиси Михаил Подолякнинг айтишича, қарши ҳужум доирасида алоҳида амалиётлар бошланган.