Енгил вазн тоифасида UFC собиқ чемпиони Ҳабиб Нурмагомедов 2013 йилнинг 25 май санасида UFC тарихидаги рекордлардан бирини янгилаган. У Абел Трухильога қарши жангда 21 та муваффақиятли тейкдаунни амалга оширган. Бу уч раунд учун ақл бовар қилмас натижа ҳисобланади. Ундан олдин ҳам, ундан кейин ҳам ҳеч ким, ҳатто, 25 дақиқалик жангда ҳам бунчалик кўп омадли тейкдаун амалга оширмаган.
Трухилё жанг сўнгида норози бўлиб ҳакамга эътироз билдирди. Таниқли шарҳловчи Жо Роган дарҳол америкалик жангича жавоб қайтарган:
“Сени октагоннинг ҳар бир дюймига улоқтирган вақтда қандай қилиб ҳакамга эътироз билдиришинг мумкин?”.
Ҳабиб Нурмагомедовнинг ўзи кўп йиллар ўтганидан кейин рекорд ҳақида эслаб, Трухильони кўпроқ йиқитмаганидан афсусда эканини, жанг вақтида тарих яратётганини билмаганини, айтганди.
“Жангдан аввал чап тиззамни жароҳатлаб олгандим. Деярли машғулот ўтказа олмасдим. Жангга кирганимда, уни йиқитдим. Аммо Трухильо ўрнидан турди, чунки мен унинг елкасидан ололмадим. Оёғимни тўғрилай олмадим, чунки тиззам оғриятганди. Мен, уни ҳар раундда улоқтирардим. Агар аниқ рекордлар борлигини билганимда... 2013 йилда, рекордлар ҳақида ҳеч ким билмас эди. Фақат кейинроқ билдимки, Шон Шерк беш раундлик жангда 16 та тейкдаун билан рекорд ўрнатган, мен эса 3 раундда 21 та тейкдаун қилдим. Агар билганимда кўпроқ улоқтирган бўлардим. Менда вазиятлар бўлди. Унинг туришига имкон бермай яна улоқтирган бўлардим. Секундантларимга тейкдаунларни санашини айтган бўлардим. Ҳозир одамлар маълум бир рекордни кўришлари ва уни янгилашга ҳаракат қилишлари мумкин”, — деган эди жангчи.
Ҳабиб Нурмагомедов жангдан олдин қандай қилиб тиззасини жароҳатлаб олгани эса алоҳида ҳикоя. Доғистонлик спортчи АКА лагери вақтида ҳар бир спаррингда, ҳатто энг умидсиз позицияларда ҳам шундай ҳаракат қилдики, охир-оқибат жароҳат олди. UFC камари учун собиқ даъвогар, Ҳабибнинг ўша йиллардаги шериги Грэй Мейнард доғистонликнинг матонатини эслаб, ҳалигача ҳайратда эканини айтади.
“Абел Трухильога қарши жангга тайёрланаётган вақтда Ҳабибнинг тиззаси қандай жароҳатланганини эслайман. Ушбу жароҳат туфайли у лагернинг ярмини машқ қилмасдан ўтказганди. Барча тейкдаунлар учун ўлгунча курашарди. Бир вазиятда мен уни деярли айлантиргандим, бироқ шу вақтда Ҳабиб тиззасидан жароҳат олди. У жароҳат олса ҳам ўзини айлантиришларига йўл қўймасди. Махлуқ”, — дея эслайди Мейнард.
Изоҳ (0)