Ўзбекистонда янги ўқув йилидан 1-синф ўқувчилари учун информатика ва ахборот технологиялари фани жорий этилади.
Бу ҳақда мактабгача ва мактаб таълими вазирининг "Умумий ўрта таълим мактаблари учун 2023/2024-ўқув йилига мўлжалланган таянч ўқув режани тасдиқлаш тўғрисида"ги буйруғида келтириб ўтилган. Унга кўра, Республика таълим марказига бир ой муддатда таянч ўқув режа асосида тегишли тақвим-мавзу режаларини ишлаб чиқиш, бир ҳафта муддатда 1-синф информатика ва ахборот технологиялари фанини ўқитиш методикаси, ўқув дастури, давлат таълим стандартлари ва тақвим-мавзу режаларини амалиётга татбиқ этиш бўйича вазирликка таклиф киритиш топширилди.
Шунингдек, А.Авлоний номидаги педагогларни касбий ривожлантириш ва янги методикаларга ўргатиш миллий-тадқиқот институтига:
- бошланғич синф ўқитувчилари учун 1-синф информатика ва ахборот технологиялари фанини замонавий методикалар асосида ўқитиш ва ўргатиш бўйича қисқа муддатли ўқув курсларининг дастурини ишлаб чиқиш;
- умумий ўрта таълим мактабларидаги 1-синф информатика ва ахборот технологиялари фанини ўқитадиган бошланғич синф ўқитувчиларини қисқа муддатли ўқув курсларига қамраб олиш графигини ишлаб чиқиш ва тасдиқлаш;
- 2023 йилнинг 25 августига қадар бошланғич синф ўқитувчилари учун информатика ва ахборот технологиялари фанининг мазмун-моҳияти бўйича қисқа муддатли ўқув курсларининг самарали ташкил этилишини мувофиқлаштириш вазифалари юклатилди.
Изоҳ (0)