“Польша Иккинчи жаҳон уруши натижасида қўлга киритилган ҳудудларни қайтариб бериши шарт” — Вячеслав Володин

Россия давлат думаси раиси Вячеслав Володин Польшадан ўз ҳудудларининг бир қисмидан воз кечишни ва “совет халқи” томонидан унинг ривожланишига сарфланган 750 миллиард долларни қоплашни талаб қилди. У бу ҳақда ўзининг Telegram каналида маълум қилди.

Володиннинг сўзларига кўра, Польша “тарихий хотирага хиёнат қилган” ва фақат Россия туфайли давлат сифатида мавжуд. 

“Ҳозирги Польша ҳудудларининг учдан бир қисми — ривожланган инфратузилма, саноат корхоналари, шунингдек, табиий ресурсларга бой ҳудудлар — мамлакатимиз шарофати билан Иккинчи жаҳон урушидан кейин унинг таркибига кирди. Урушдан кейинги даврда совет халқи Польшани тиклаш ва ривожлантириш учун 750 миллиард доллардан ортиқ маблағ сарфлади.

800 дан ортиқ саноат, энергетика ва транспорт объектлари қурилди. Польша Иккинчи жаҳон уруши натижасида қўлга киритилган ҳудудларни қайтариб бериши ва Россияга уруш ва урушдан кейинги йилларда сарфланган маблағларни қоплаши шарт”, — дейди Володин.

Шунингдек, Володин 22 май, душанба куни давлат думаси Польша юк машиналарининг Россия орқали транзитини тақиқлаш масаласини кўриб чиқишини айтди. У бу ҳолатда Польшанинг харажатлари тахминан 8,5 миллиард еврони ташкил қилиши мумкинлиги ва Польшанинг 2000 га яқин транспорт компаниялари ҳам зарар кўришини билдирди.