Илон Маск кунига 6 соат ухлаши ва ҳафтасига етти кун ишлаши ҳақида сўзлаб берди

Америкалик миллиардер Илон Маск CNBC телеканалига берган интервьюсида кечаси олти соат ухлаши ва ҳафтасига етти кун ишлаши ҳақида гапириб берди.

Илон Маскнинг сўзларига кўра, у камроқ ухлашга ҳаракат қилган, бироқ бу миллиардернинг ўзини яхши ҳис қилишига салбий таъсир қилган. Шунингдек, Маск йилига атиги икки ёки уч кун дам олишини маълум қилди.

“Вақт ягона ҳақиқий валюта”, — дейди Маск.

Америкалик тадбиркор масофадан туриб ишлаётган ходимларни ҳам танқид қилиб, уларнинг Ла-Ла-Лендда яшашини айтди. Маск буни адолатсизлик деб билишини, чунки ҳамма касб эгалари ҳам, масалан, курерлар ва муҳандислар уйдан туриб ишлай олмаслигини айтди.

“Бу шунчаки ишлаш масаласи эмас. Менимча, бу ахлоқий нуқтаи назардан нотўғри”, — дейди тадбиркор.

Яқинда Илон Маск Twitter раҳбари лавозимини тарк этиб, Линда Яккаринони ижтимоий тармоқ бош директори этиб тайинлади. У 2021 йилдан буён NBC Universal компаниясининг реклама сотуви бўйича масъул ходими сифатида фаолият юритаётган эди.