Жанубий Флорида университети профессори Жозеф Дитури сув остида энг узоқ вақт сув остида яшаш бўйича жаҳон рекордини ўрнатди. У 75 кун давомида Кей-Ларгодаги тўққиз метрлик лагунанинг тубидаги сув ости капсуласида бўлди, дея хабар бермоқда “Правила жизни” нашри.
“Доктор Чуқур денгиз” номи билан ҳам танилган 55 ёшли олим 1 март куни сув ости капсуласига шўнғиган ва ўшандан буён шу ерда яшаб, ишлаб келмоқда. Сув остида энг узоқ қолиш бўйича аввалги рекорд 73 кун-у 2 соат 34 дақиқани ташкил қилган. Бу рекорд 2014 йилда худди айнан шу жойда икки олим томонидан ўрнатилган.
Бироқ Дитури бу билан тўхтаб қолмайди: унинг мақсади 100 кунни сув остида ўтказиш. Олимнинг эксперименти инсон танасининг ҳаддан ташқари босим шароитида сув остида узоқ вақт қолишга реакциясини текширишдан иборат.
“Мақсад дунё океанида яшашни ўрганиш, яшаш ва унга яхши муносабатда бўлиш орқали ғамхўрлик қилиш”, — дейди профессор.
Бундан ташқари, Дитури сув остида яшаш қариш билан боғлиқ касалликларнинг олдини олишини исботламоқчи. Олимнинг сўзларига кўра, юқори босимга узоқ вақт таъсир қилиш организм ҳужайраларига фойдали таъсир кўрсатади.
Капсулада яшаган профессор ҳар куни аҳволи ҳақида тиббий маълумотларни тўплайди ва турли тажрибалар ўтказади. Шунингдек, у талабалар учун онлайн маърузалар ўтказади ва интервью беради. Тиббий гуруҳ вақти-вақти билан Дитурининг соғлиғини текшириш учун сув остига шўнғийди.
Изоҳ (0)