Россия 2023/2024-ўқув йилида Марказий Осиё мамлакатлари талабалари учун квоталар сонини оширади. Бу ҳақда Россия ташқи ишлар вазири ўринбосари Михаил Галузинга таяниб, “Интерфакс” хабар берди.
Михаил Галузин Томск университетида бўлиб ўтаётган “Валдай” халқаро мунозара клубининг учинчи Марказий Осиё конференциясида бу ҳақда маълумот берди.
“2023/2024-ўқув йилида биз Қозоғистон фуқароларини ўқитиш учун квотани сезиларли даражада оширмоқдамиз, қўшимча 200 ўрин, Қирғизистон учун 200, Ўзбекистон учун 50 ва Тожикистон учун 152 ўрин”, — деди Галузин.
Унга кўра, ҳозирда Россияда Марказий Осиё давлатларидан 185 мингга яқин талаба таҳсил олмоқда, шундан 68 мингга яқин талаба Россия бюджети ҳисобидан ўқийди.
Бундан ташқари, Галузин яқин келажакда бир қатор Марказий Осиё давлатларида Россиянинг етакчи университетларининг филиалларини очиш режалаштирилаётганини айтди.
“Қирғизистонда Россиянинг етакчи олий ўқув юртлари: Ломоносов номидаги Москва давлат университети, Қозон федерал университети ва Олий иқтисодиёт мактаби филиалларини, Ўзбекистонда Россия гуманитар университети, Москва давлат геодезия ва картография университети ва Шимолий Кавказ федерал университетини очиш режалаштирилган”, — деди вазир ўринбосари.
У Ашхободда Россия—Туркманистон қўшма университетини ташкил этиш лойиҳаси келишув босқичида эканини қўшимча қилди.
“Буларнинг барчаси Марказий Осиёда фаолият юритаётган университетларимизнинг 25 та филиалига қўшимча бўлади”, — дея хулоса қилди у.
Изоҳ (0)