Тошкент шаҳрида жойлашган “Самарқанд дарвоза” савдо маркази олдида 2 апрель куни автомобиль йўл қисмида чўкиш юз берган эди. Ҳолат юзасидан “Дарё” мухбири Veolia Energy Tashkent иссиқлик таъминоти оператори ахборот хизмати билан боғланиб изоҳ олди.
Айтилишича, ҳолат иссиқ сув босимини текшириш натижасида юз берган. Аниқланган носозлик қисми бартараф этилган. Шунингдек, ўпирилиб тушган йўл қисми таъмирланмоқда.
Қўшимча қилинишича, ҳодиса оқибатида авотомобилга етказилган зарар суғурта компанияси томонидан қоплаб бериладиган бўлган.
Қурилиш ва уй-жой коммунал хўжалиги вазирлиги ахборот хизматининг “Дарё”га маълум қилишича, юқоридаги каби ҳолатларда инсонларга ёки техник воситаларга зарар етган тақдирда ўша ҳудудга масъул бўлган иссиқлик таъминоти корхонаси жавобгар бўлади ва низолар суд тартибида ҳал этилади.
Маълумот учун, Тошкент шаҳрида иссиқ сув таъминотини узмаган ҳолда иситиш тармоқлари гидравлик синовдан ўтказилиши юзасидан эълон берилган.
Унда айтилишича, 2023 йил 1 майдан бошлаб 4 августгача иссиқлик тармоқларининг гидравлик синовлари ўтказилади (механик куч ва зичлик учун юқори босим остида иссиқлик тармоқларининг синовлари). Сана ва манзиллар юқоридаги ҳавола орқали келтирилган.
Синовлар давомида иссиқлик тармоқлари қувурларининг шикастланиши ва иссиқ сув йўллар ва йўлакларга чиқиши мумкин. Ҳайдовчилар, пиёдалар ҳамда маъмурий ва турар жой биноларида яшовчи фуқаролардан эътиборли ва эҳтиёт бўлишлари сўралади.
Изоҳ (0)