“Nemolchi.uz” лойиҳаси муаллифи ўлим таҳдиди сабабли Ўзбекистонни вақтинча тарк этгани ҳақида хабар берилган эди. АОКА мазкур ҳолатга муносабат билдирди.
АОКА бу каби ҳолатларни сўз ва ахборот эркинлигини таъминлаш, журналистларнинг эркин фаолият кўрсатиши борасидаги янгича очиқлик сиёсатига зид хатти-ҳаракатлар сифатида кескин қоралаши таъкидланган. Шунга кўра, АОКА воқеликни ўрганиш ҳамда вазиятга ҳуқуқий баҳо бериш учун Бош прокуратурага ушбу масалани назоратга олишни сўраб расмий хат орқали мурожаат қилди.
Айни пайтда Ирина Матвиенконинг шахсий саҳифасида эълон қилинган хабар ҳуқуқни муҳофаза қилиш органлари ва мутасадди идоралар томонидан ўрганилмоқда.
“Агентлик олиб борилаётган ўрганиш натижаларини диққат билан кузатиб боради ҳамда журналист ҳаёти хавфсизлиги таъминланишига, шунингдек, қонунчиликка зид равишда таҳдид қилган шахсларга нисбатан қонуний чоралар кўрилишига ишонади”, — дейилади муносабатда.
Ирина Матвиенко ўзининг саҳифаларида бўлган воқеа ҳақида айтиб берган. Унга кўра, апрель ойида унга ўлим таҳдиди билан хабар келган. Шундан сўнг у психологга мурожаат қилган ва Тбилисига кетишга қарор қилган.
“Ҳеч қачон таҳдид мени бунчалик қўрқитади, деб ўйламаган эдим. Биргина таҳдид сабаб Ўзбекистондан кетишим хаёлимга ҳам келмаганди”, — деб ёзган у.
Ички ишлар вазирлиги ахборот хизмати ҳолат юзасидан маълумот бериб, ҳозирда журналистга келган таҳдидли хабар Тезкор қидирув департаменти Киберхавфсизлик маркази томонидан ўрганилаётганини маълум қилди.
“Жамоат фаоли Ирина Матвиенконинг шахсий аккаунтига юборилган таҳдидли хабар Ўзбекистон Республикаси Ички ишлар вазирлиги Тезкор қидирув департаменти Киберхавфсизлик маркази томонидан ўрганилмоқда.
Ўрганиш натижалари бўйича ҳолатга ҳуқуқий баҳо берилади”, — дейилади ИИВ баёнотида.
Изоҳ (0)