Ўтган ҳафтада инфекция ташхиси қўйилган Туркия президенти Ражаб Тоййиб Эрдўғон маҳаллий телеканалларда ўзини яхши ҳис қилаётганини ва сайловолди дастури доирасида иш бошлаганини айтди. Бу ҳақда Sabah хабар берди.
“Мен ўзимни жуда яхши ҳис қиляпман. Биз митинглар ўтказишда танаффус қилмадик, бутун дастурни тикладик”, — деган у.
25 апрель куни Ражаб Тоййиб Эрдўғон жонли эфирда ўзини ёмон ҳис қилди. Баъзи оммавий ахборот воситалари унинг юрак хуружига учраганини даъво қилди. Кейинроқ президент вакиллари буни рад этди. Эрдўғон соғлиғининг ёмонлашишининг сабабини ошқозон гриппи деб атади. Эртаси куни шифокорлар маслаҳати билан барча оммавий тадбирлар бекор қилинди.
69 ёшли Эрдўғон касалликдан сўнг онлайн тарзда бир қанча расмий тадбирларда иштирок этди. 29 апрель куни Эрдўғон касал бўлганидан кейин биринчи марта омма олдига чиқди. 30 апрель куни у касал бўлганидан кейин биринчи сайлов митингини ўтказди. Туркияда президентлик сайловлари 14 май куни бўлиб ўтади.
Туркия президентлиги учун даъвогарлар рўйхатига тўрт киши киритилган:
- мамлакатнинг амалдаги раҳбари Ражаб Тоййиб Эрдўғон;
- Олти мухолифатчи партияси алянсидан (Халқ алянси) номзод ва Туркия Халқ партияси раиси Камол Қиличдарўғли;
- “Ватан” партияси раиси Муҳаррам Инже (114,6 минг имзо тўплаган);
- “Отатуркчилар иттифоқи”дан номзод Синан Оган (111,5 минг имзо тўплаган).
Туркияда президентлик сайловлари
2022 йил август ойида Туркияда президентлик сайловлари 2023 йил 18 июнда бўлиб ўтиши хабар қилинганди, бироқ 23 январь куни Туркиянинг амалдаги президенти Ражаб Тоййиб Эрдўғон мамлакатда сайловлар 14 майга белгиланганини маълум қилди.
22 март куни Туркиянинг амалдаги президенти Ражаб Тоййиб Эрдўғон мамлакатда бўлиб ўтадиган президентлик сайловларида ўз номзодини қўйишини расман эълон қилди. Бир неча кундан кейин Камол Қиличдарўғлининг номзоди расман рўйхатга олинди.
Сайловнинг биринчи босқичида ғалаба қозониш учун давлат раҳбари лавозимига номзод 50 фоиздан ортиқ овоз тўплаши керак. Акс ҳолда, иккинчи босқич бўлиб ўтади, унда биринчисида энг кўп қўллаб-қувватланган икки номзод иштирок этади.
Аввалги президентлик сайлови 2018 йил 24 июнь куни бўлиб ўтганди. Уда Эрдўғон 52,6 фоиз овоз тўплаган ҳолда ғалаба қозонган. Март ойи бошида Эрдўғон сайловчиларга мухолифат номзодининг ғалабаси Туркия учун фалокат бўлишини айтган.
Изоҳ (0)