Тадбиркорлар ҳисоб рақамидаги пулни ноқонуний олиб қўйганлик учун жавобгарлик белгиланмоқда
Сенатнинг Бюджет ва иқтисодий ислоҳотлар масалалари қўмитасининг навбатдаги мажлисида “Ўзбекистон Республикасининг айрим қонун ҳужжатларига тадбиркорларнинг банк ҳисобварақларидаги пул маблағлари дахлсизлигини таъминлашга қаратилган қўшимча ва ўзгартишлар киритиш тўғрисида”ги қонун кўриб чиқилди.
Мажлисда Ўзбекистонда бугунги кунда тадбиркорларни ташвишга солаётган муаммоларни ҳал этиш орқали уларнинг ҳуқуқ ва манфаатларини ҳимоя қилишга қаратилган қатор қонун ҳужжатлари қабул қилинаётган бўлиб, мазкур қонун ҳам бу борадаги ишларнинг мантиқий давоми ҳисобланиши қайд этилди.
Хусусан, қонун билан тадбиркорлик субъектларининг банк ҳисоб варақларидан пул маблағларини уларнинг розилигисиз қонунга хилоф равишда ўтказганлик ёки олиб қўйганлик ёхуд ортиқча ундирилган маблағларни ўз вақтида қайтармаганлик учун Маъмурий жавобгарлик тўғрисидаги кодексида ва Жиноят кодексида маъмурий ва жиноий жавобгарлик чоралари белгиланмоқда.
Қонун билан Маъмурий жавобгарлик тўғрисидаги кодексга қўшимча модда киритилиб, банк ҳисоб варақларидаги пул маблағларини тадбиркорлик субъектларининг розилигисиз қонунга хилоф равишда ўтказиш ёки олиб қўйиш ёхуд ортиқча ундирилган пулни ўз вақтида қайтармаслик ҳолати бўйича айбдорга базавий ҳисоблаш миқдорининг 20 баробаридан 40 баробаригача (6,6 млн сўмдан 13,2 млн сўмгача) миқдорда жарима солиниши қайд этилмоқда.
Шунингдек, қонун билан тадбиркорларнинг пул маблағларини қонунга хилоф равишда ўтказиш ёки олиб қўйиш ёхуд уларни ўз вақтида қайтармаслик юзасидан Жиноят кодексига қўшимча модда киритилмоқда, унга кўра мазкур ҳолатлар маъмурий жазо қўлланилгандан кейин ҳам содир этиладиган бўлса, базавий ҳисоблаш миқдорининг 200 баробаридан 300 бараваригача миқдорда жарима, содир этилган жиноятнинг тоифасига қараб 7 йилгача озодликдан маҳрум қилиш жазоси белгиланмоқда.
Қонун қўмита мажлисида дастлабки тарзда кўриб чиқилди ва унинг қабул қилиниши тадбиркорлик субъектларининг қонуний манфаатларини ҳимоя қилишнинг ҳуқуқий чораларини кучайтиришга ва уларнинг мулкий ҳуқуқлари дахлсизлигини ҳимоя қилиш самарадорлигини оширишга хизмат қилиши қайд этилди.
