“Ироққа бир нафар америкалик ҳам кўплик қилади” — Эрон олий раҳнамоси

Эрон олий раҳнамоси Оятуллоҳ Али Хоманаий Ироқ президенти Абдул Латиф Рашидга “Ироқда бир нафар америкаликнинг бўлиши ҳам кўплик” қилишини айтди. Бу ҳақда Al Jazeera хабар берди.

Томонлар Абдул Латиф Рашиднинг 2022 йил президент этиб сайланганидан кейин Эронга биринчи ташрифида учрашди. Рашид Эрон президенти Иброҳим Раисий ва парламент спикери Муҳаммад Багир Ғолибаф билан ҳам учрашув ўтказди.

“Америкаликлар Ироқнинг дўсти эмас. Америкаликлар ҳеч ким билан дўстлашмайди ва ҳатто ўзларининг европалик дўстларига ҳам содиқ эмас”, — деган Хоманаий Ироқ президентига.

Олий раҳнамо АҚШни қўшни давлатдан чиқариб юборишга урғу бериш билан бирга, Эрон Ироқнинг тараққиётини муҳим деб билишини таъкидлади ва ўтган ой имзоланган икки томонлама хавфсизлик ва иқтисодий келишувлар тўлиқ амалга оширилиши кераклигини айтди.

“Эрон ва Ироқ ўртасидаги муносабатларни кенгайтириш ва чуқурлаштиришга қарши кучли душманлар бор ва агар икки давлат ўртасида мустаҳкам тарихий ва эътиқодга асосланган алоқалар бўлмаганида, эҳтимол муносабатлар Саддам Ҳусайн даврига қайтарди”, — деган у.

Рашиднинг айтишича, унинг ҳукумати Эрон билан алоқаларни чуқурлаштиришга ҳаракат қилади ва келишмовчиликларни бартараф этишни хоҳлайди.