Қозоғистон Мажлиси (парламенти қуйи палатаси) депутатлари президент Қосим-Жўмарт Тўқаев томонидан таклиф этилган Алихон Смаиловнинг номзодини кўпчилик овоз билан республика бош вазири лавозимига маъқуллади, деб хабар бермоқда “KazTAG”.
Қайд этилишича, овоз беришда иштирок этган 97 депутатдан 82 нафари Смаиловнинг қайта тайинланишини ёқлаган, етти нафари қарши чиққан, яна саккиз киши бетараф қолган. Собиқ бош вазирнинг қайта сайланишига Умуммиллий социал-демократик партия (НСДП) вакили бўлган парламент мухолифати қарши бўлди.
Тўқаев парламентдаги нутқида бош вазирликка номзодни тажрибали, ҳалол ва меҳнатсевар инсон деб атади.
“У ҳукумат олдида турган муаммоларни яхши билади. Унга янги ҳукумат жиловини ишониб топшириш мумкинлигига аминман”, — деди Тўқаев.
Мажлисда овоз беришдан сўнг Тўқаев Смаиловни қайта тайинлаш тўғрисидаги фармонни имзолади.
30 март куни эрталаб парламентдаги кўпчилик ўринга эга бўлган “Amanat” партияси президентга Смаиловни бош вазир лавозимига тасдиқлашни таклиф қилган. Шундан сўнг, қонунга мувофиқ, Тўқаев барча парламент фракциялари раҳбарлари билан учрашув ўтказиб, бош вазир номзодини муҳокама қилган.
Смаилов Қозоғистонда 2022 йил январь воқеаларидан кейин бош вазир лавозимига тайинланган эди. 2023 йил 29 март куни янги конституцияга мувофиқ Смаиловнинг ваколат муддати тугади, унинг раҳбарлигидаги ҳукумат тўлиқ таркибда истеъфога чиқди.
Изоҳ (0)